آخری خبر

وہ جو اپنے پچھواڑے اک بیری تھی

ساری دوپہری لڑکے اس کے گرد اکٹھا رہتے تھے

اور پتھر مارا کرتے تھے

اتنے پتھر

اتنے پتھر

سب آنگن بھر جاتا تھا

بیری زخمی ہو جاتی تھی

شاخیں لہولہان کراہتی رہتی تھیں

پتھر مارنے والے لڑکوں میں تم آگے ہوتے تھے

اور دوپہریں

ایک ذرا اچھی کٹ جایا کرتی تھیں

یہ تو خیر

بھولی بسری باتیں تھیں

کل وہ بیری اماں نے کٹوا دی ہے

مجھ کو تو کچھ اتنا زیادہ غم بھی نہیں

میں بھی اپنے آپ سے کٹ کر

آخر زندہ ہوں کہ نہیں