isi do-rahe par

ab na un ūñche makānoñ meñ qadam rakhūñgā

maiñ ne ik baar ye pahle bhī qasam khaa.ī thī

apnī nādār mohabbat kī shikastoñ ke tufail

zindagī pahle bhī sharmā.ī thī jhunjhulā.ī thī

aur ye ahd kiyā thā ki ba-īñ hāl-e-tabāh

ab kabhī pyaar bhare giit nahīñ gā.uñgā

kisī chilman ne pukārā bhī to baḌh jā.ūñgā

koī darvāza khulā bhī to palaT ā.ūñgā

phir tire kāñpte hoñToñ kī fusūñ-kār hañsī

jaal bunñe lagī buntī rahī buntī hī rahī

maiñ khiñchā tujh se magar tū mirī rāhoñ ke liye

phuul chuntī rahī chuntī rahī chuntī hī rahī

barf barsā.ī mire zehn o tasavvur ne magar

dil meñ ik sho.ala-e-be-nām sā lahrā hī gayā

terī chup-chāp nigāhoñ ko sulagte pā kar

merī bezār tabī.at ko bhī pyaar aa hī gayā

apnī badlī huī nazroñ ke taqāze na chhupā

maiñ is andāz kā mafhūm samajh saktā huuñ

tere zar-kār darīchoñ kī bulandī kī qasam

apne iqdām kā maqsūm samajh saktā huuñ

ab na un ūñche makānoñ meñ qadam rakhūñgā

maiñ ne ik baar ye pahle bhī qasam khaa.ī thī

isī sarmāya o aflās ke dorāhe par

zindagī pahle bhī sharmā.ī thī jhunjhulā.ī thī

ab na un unche makanon mein qadam rakhunga

main ne ek bar ye pahle bhi qasam khai thi

apni nadar mohabbat ki shikaston ke tufail

zindagi pahle bhi sharmai thi jhunjhulai thi

aur ye ahd kiya tha ki ba-in haal-e-tabah

ab kabhi pyar bhare git nahin gaunga

kisi chilman ne pukara bhi to baDh jaunga

koi darwaza khula bhi to palaT aaunga

phir tere kanpte honTon ki fusun-kar hansi

jal bunne lagi bunti rahi bunti hi rahi

main khincha tujh se magar tu meri rahon ke liye

phul chunti rahi chunti rahi chunti hi rahi

barf barsai mere zehn o tasawwur ne magar

dil mein ek shoala-e-be-nam sa lahra hi gaya

teri chup-chap nigahon ko sulagte pa kar

meri bezar tabiat ko bhi pyar aa hi gaya

apni badli hui nazron ke taqaze na chhupa

main is andaz ka mafhum samajh sakta hun

tere zar-kar darichon ki bulandi ki qasam

apne iqdam ka maqsum samajh sakta hun

ab na un unche makanon mein qadam rakhunga

main ne ek bar ye pahle bhi qasam khai thi

isi sarmaya o aflas ke dorahe par

zindagi pahle bhi sharmai thi jhunjhulai thi