islam-abaad ki ek sham

zamīñ pe patte bikhar rahe haiñ

ḳhunuk huā ke udaas jhoñke

ga.ī rutoñ kī talāsh meñ haiñ

ḳhizāñ-zada bāġh-e-be-bahārāñ

ye kah rahā hai ki mujh ko dekho

ajiib din haiñ ajiib rāteñ

shikasta-pā be-nishāñ savere

mirā muqaddar haiñ bas añdhere

na ab parinde shajar pe gaate haiñ giit koī

bas ek be-nām fāsla hai

jo kohna peḌoñ ke darmiyāñ hai

ye girte pattoñ kī dāstāñ hai

buland-o-bālā daraḳht tanhā

fasurda jañgal ke darmiyāñ ab luTe khaḌe haiñ

ki saare manzar sisak rahe haiñ

tamām jañgal sukūt-e-ġham ke hisār meñ hai

hamāre hāthoñ se mish.al-e-ḳhvāb kis ne chhīnī

havā nahīñ hai to kaun mujrim hai, kuchh batāo

ye shaam patjhaḌ kī dā.imī to nahīñ hai 'nāzish'

bahār kī sub.h aane vaalī hai ġham na karnā

ummīd kā jo diyā jalāyā hai, us kī lau ko

havāoñ ke Dar se kam na karnā

jo kulfateñ haiñ jo vahshateñ haiñ

ye zindagī kī haqīqateñ haiñ

zamin pe patte bikhar rahe hain

KHunuk hua ke udas jhonke

gai ruton ki talash mein hain

KHizan-zada bagh-e-be-bahaaran

ye kah raha hai ki mujh ko dekho

ajib din hain ajib raaten

shikasta-pa be-nishan sawere

mera muqaddar hain bas andhere

na ab parinde shajar pe gate hain git koi

bas ek be-nam fasla hai

jo kohna peDon ke darmiyan hai

ye girte patton ki dastan hai

buland-o-baala daraKHt tanha

fasurda jangal ke darmiyan ab luTe khaDe hain

ki sare manzar sisak rahe hain

tamam jangal sukut-e-gham ke hisar mein hai

hamare hathon se mishal-e-KHwab kis ne chhini

hawa nahin hai to kaun mujrim hai, kuchh batao

ye sham patjhaD ki daimi to nahin hai 'nazish'

bahaar ki subh aane wali hai gham na karna

ummid ka jo diya jalaya hai, us ki lau ko

hawaon ke Dar se kam na karna

jo kulfaten hain jo wahshaten hain

ye zindagi ki haqiqaten hain