ism-e-azam

ikkīs saal umr thī us kī bas

abhī us ne goyā zindagī ko aañkh bhar ke dekhā bhī na thā

khelne kūdne ke din the ki zamāne kī riit ke mutābiq

chaT mañgnī paT byaah ho gayā

aur tiin saal meñ tiin bachche bhī paidā ho ga.e

phir achānak bechārī ko vo bīmārī mil ga.ī

jis ke panje se koī ḳhush-nasīb hī chhuTtā hai

mujhe barsoñ pahle gaañv meñ apnī chitkabrī bakrī yaad aa ga.ī

jis ne ek jholī meñ pāñch bachche diye the

aur chand roz ba.ad mar ga.ī thī

marī huī bakrī ke thanoñ se is ke pāñchoñ bachche

duudh kī āḳhirī buuñd tak nichoḌ lene ke chakkar meñ

ek dūsre se guttham-gutthā ho rahe the

maiñ ne ḳhudā se kahā

ġhazab ke sitam-zarīf ho tum bhī

aadmī ko itnā kamzor paidā kiyā hai

bakrī kā bachcha to janm lete hī chaar Tāñgoñ par khaḌā ho jaatā hai

magar aadmī kā bachcha baras-hā-baras tak yatīmoñ kī tarah sahāre DhūñDhtā phirtā hai

aur phir tum ye sahāre bhī chhīn lete ho

chalo marhūm baap kī jagah to tum ḳhud pur kar lete ho

ki āsmānī baap kahlāne kā tumheñ azal se shauq hai

lekin ye nau-maulūd aur nau-ḳhez bachchoñ ko tum maaoñ se kis khāte meñ mahrūm kar dete ho

hañsā bahut hañsā

maiñ kahe baġhair na rah sakā ki āfrīn hai

dūsre ke dukh par is tarah khile bandoñ to saffāk siyāsat-dāñ bhī nahīñ hañste

achānak merā shāna jhiñjhoḌ kar bolā zarā merī taraf dekho

mujhe gumān thā ki to raat aur qur.ān ke aurāq se nikal kar

ek pur-jalāl mardāna paikar mere sāmne hogā

magar vahāñ to ek harī-bharī aurat khaḌī thī

jis kī chhātiyoñ se duudh kī dhāreñ favvāre kī tarah phuuT rahī thiiñ

qarīb thā ki maiñ ġhash khā kar gir jaatā

isī ne mujhe sambhālā diyā

aur dhīre se kahā

maiñ baap bhī huuñ āsmānoñ meñ

maiñ maañ bhī huuñ zamīn par

dobāra us kī jānib dekhā

āñkhoñ se do garm garm aañsū mere chehre par Tapak paḌe

maiñ ne kahā pahle tum hañs rahe the

ab tum ro rahī ho

kahā hañsī aur rone kā ek hī naam hai

zindagī

maiñ ne kahā tumhāre mardāna nāmoñ kā to shumār nahīñ

logoñ ko ninnānve ke phere meñ Daal rakkhā hai tum ne

murshidoñ se ism-e-āzam pūchhte pūchhte behāl ho jaate haiñ

ab tumhāre zanānā naam bhī DhūñDne paḌeñge

zer-e-lab muskurā ke kahā

paidā hote hī tum sab ke muñh par merā ism-e-āzam aa jaatā hai

har koī az-ḳhud pukār uThtā hai

maañ

aur phir apnī maañ kī chāhat meñ sab kī maañ kī bhuul jaatā hai

naam bhī yaad nahīñ rahtā us kā

ikkis sal umr thi us ki bas

abhi us ne goya zindagi ko aankh bhar ke dekha bhi na tha

khelne kudne ke din the ki zamane ki rit ke mutabiq

chaT mangni paT byah ho gaya

aur tin sal mein tin bachche bhi paida ho gae

phir achanak bechaari ko wo bimari mil gai

jis ke panje se koi KHush-nasib hi chhuTta hai

mujhe barson pahle ganw mein apni chitkabri bakri yaad aa gai

jis ne ek jholi mein panch bachche diye the

aur chand roz baad mar gai thi

mari hui bakri ke thanon se is ke panchon bachche

dudh ki aaKHiri bund tak nichoD lene ke chakkar mein

ek dusre se guttham-guttha ho rahe the

main ne KHuda se kaha

ghazab ke sitam-zarif ho tum bhi

aadmi ko itna kamzor paida kiya hai

bakri ka bachcha to janm lete hi chaar Tangon par khaDa ho jata hai

magar aadmi ka bachcha baras-ha-baras tak yatimon ki tarah sahaare DhunDhta phirta hai

aur phir tum ye sahaare bhi chhin lete ho

chalo marhum bap ki jagah to tum KHud pur kar lete ho

ki aasmani bap kahlane ka tumhein azal se shauq hai

lekin ye nau-maulud aur nau-KHez bachchon ko tum maon se kis khate mein mahrum kar dete ho

hansa bahut hansa

main kahe baghair na rah saka ki aafrin hai

dusre ke dukh par is tarah khile bandon to saffak siyasat-dan bhi nahin hanste

achanak mera shana jhinjhoD kar bola zara meri taraf dekho

mujhe guman tha ki to raat aur quran ke auraq se nikal kar

ek pur-jalal mardana paikar mere samne hoga

magar wahan to ek hari-bhari aurat khaDi thi

jis ki chhatiyon se dudh ki dhaaren fawware ki tarah phuT rahi thin

qarib tha ki main ghash kha kar gir jata

isi ne mujhe sambhaala diya

aur dhire se kaha

main bap bhi hun aasmanon mein

main man bhi hun zamin par

dobara us ki jaanib dekha

aankhon se do garm garm aansu mere chehre par Tapak paDe

main ne kaha pahle tum hans rahe the

ab tum ro rahi ho

kaha hansi aur rone ka ek hi nam hai

zindagi

main ne kaha tumhaare mardana namon ka to shumar nahin

logon ko ninnanwe ke phere mein Dal rakkha hai tum ne

murshidon se ism-e-azam puchhte puchhte behaal ho jate hain

ab tumhaare zanana nam bhi DhunDne paDenge

zer-e-lab muskura ke kaha

paida hote hi tum sab ke munh par mera ism-e-azam aa jata hai

har koi az-KHud pukar uThta hai

man

aur phir apni man ki chahat mein sab ki man ki bhul jata hai

nam bhi yaad nahin rahta us ka