ismat ke phul

mire qarīb mohabbat kā ek jangal hai

jo is samāj kī rusvā.iyoñ kā āñchal hai

yahāñ pe log mohabbat ke giit gaate haiñ

yahīñ pe jism ġharīboñ ke noche jaate haiñ

yahāñ pe husn kā bāzār roz lagtā hai

yahīñ pe 'ishq kī rasmoñ kā daur-daura hai

yahāñ pe saare 'ibādat-guzār baiThte haiñ

yahīñ pe saare taqaddus guzār baiThte haiñ

yahāñ kī shaam mohabbat meñ raqs kartī hai

yahāñ kī raat añdheroñ meñ laḌkhaḌātī hai

yahāñ hijāb kī partoñ meñ aayā jaatā hai

yahīñ gulāb kī kaliyoñ ko maslā jaatā hai

yahāñ ke logoñ ko ham itnā saaf dekhte haiñ

ki jaise shaiḳh-e-adab zer-e-nāf dekhte haiñ

yahīñ pe shaiḳh-e-adab apnī raah bhūlte haiñ

yahīñ to shaiḳh-e-adab 'izz-o-jāh bhūlte haiñ

har ek shaḳhs usī dar se ho ke guzrā hai

yahāñ pe koī kahāñ āsmāñ se Tapkā hai

yahīñ to saare musāfir qiyām karte haiñ

yahīñ pe saare muhājir kalām karte haiñ

inhīñ ke zer-e-kisā vahshateñ panaptī haiñ

inhīñ ke zer-e-qadam jannateñ machaltī haiñ

ab iḳhtiyār tumhārā hai kyā uThānā hai

ye jism jannat-o-dozaḳh kā āshiyānā hai

mere qarib mohabbat ka ek jangal hai

jo is samaj ki ruswaiyon ka aanchal hai

yahan pe log mohabbat ke git gate hain

yahin pe jism gharibon ke noche jate hain

yahan pe husn ka bazar roz lagta hai

yahin pe 'ishq ki rasmon ka daur-daura hai

yahan pe sare 'ibaadat-guzar baiThte hain

yahin pe sare taqaddus guzar baiThte hain

yahan ki sham mohabbat mein raqs karti hai

yahan ki raat andheron mein laDkhaDati hai

yahan hijab ki parton mein aaya jata hai

yahin gulab ki kaliyon ko masla jata hai

yahan ke logon ko hum itna saf dekhte hain

ki jaise shaiKH-e-adab zer-e-naf dekhte hain

yahin pe shaiKH-e-adab apni rah bhulte hain

yahin to shaiKH-e-adab 'izz-o-jah bhulte hain

har ek shaKHs usi dar se ho ke guzra hai

yahan pe koi kahan aasman se Tapka hai

yahin to sare musafir qiyam karte hain

yahin pe sare muhajir kalam karte hain

inhin ke zer-e-kisa wahshaten panapti hain

inhin ke zer-e-qadam jannaten machalti hain

ab iKHtiyar tumhaara hai kya uThana hai

ye jism jannat-o-dozaKH ka aashiyana hai