ittifaq

tamām log ibtidā meñ

ek dūsre ke sāmne

hujūm meñ dikhā.ī dene vaale kuchh nishāñ

mahz ajnabī

phir yakā-yak mo.ajaza tulū kā

aur ek rū-e-āftāb

bādaloñ ke paar se nikal ke rū-ba-rū

ḳhirām-e-nūr kū-ba-kū

purānā shahr

vaqt-e-shām

phailtā umaDtā ajnabī hujūm

hāo-hū ke darmiyān mo.ajaza huā

aur ek muztarib hasīn rū-e-dil-gudāz

mere jism o jaañ meñ dekhte hī dekhte samā gayā

vo raushnī thā mauj-e-āftāb thā

bas ik nazar meñ jaise maiñ ne us ko pā liyā

maiñ dam-ba-ḳhud sā rah gayā

ye hādsa thā vāqi.a thā kaisā ittifāq thā

tulū-e-nūr ke jilau meñ

ik tavīl pur-ḳhatar siyāh raat

shahr meñ utar ga.ī

tamam log ibtida mein

ek dusre ke samne

hujum mein dikhai dene wale kuchh nishan

mahz ajnabi

phir yaka-yak moajaza tulu ka

aur ek ru-e-aftab

baadalon ke par se nikal ke ru-ba-ru

KHiram-e-nur ku-ba-ku

purana shahr

waqt-e-sham

phailta umaDta ajnabi hujum

hao-hu ke darmiyan moajaza hua

aur ek muztarib hasin ru-e-dil-gudaz

mere jism o jaan mein dekhte hi dekhte sama gaya

wo raushni tha mauj-e-aftab tha

bas ek nazar mein jaise main ne us ko pa liya

main dam-ba-KHud sa rah gaya

ye hadsa tha waqia tha kaisa ittifaq tha

tulu-e-nur ke jilau mein

ek tawil pur-KHatar siyah raat

shahr mein utar gai