اتفاق

تم اتفاق سے پھر یاد آ گئے مجھ کو

یہ اتفاق مگر کس قدر حسیں نکلا

تمہاری یاد نے بخشی ہے روشنی جس کو

تمہارا عکس اسی دل میں جاگزیں نکلا

اس اتفاق پہ قربان کیوں نہ ہو جائیں

تمہاری دید مکرر کا آسرا ٹھہرا

وہ آرزو جو تمہیں دیکھ کر پنپتی ہے

اس اتفاق سے اس کا بھی سلسلہ ٹھہرا

یہ راز کیا ہے کہ دل کے قریب ہو کر بھی

نظر نواز تمہارا جمال ہو نہ سکا

جنوں نقاب کشائی کہیں کرے تو کرے

کبھی خرد سے تو حل یہ سوال ہو نہ سکا

نظر اٹھے تو گرے اس پہ پردۂ حیرت

نظر اٹھا کے تماشا بنے تماشائی

جو اتفاق سے تم سامنے کبھی آؤ

نظر کو لوٹ کے لے جائے جلوہ آرائی