ittihad

ye desh ki hindū aur muslim tahzīboñ kā shīrāza hai

sadiyoñ kī purānī baat hai ye par aaj bhī kitnī taaza hai

tārīḳh hai is kī ek amal tahlīloñ kā tarkīboñ kā

sambandh vo do ādarshoñ kā sanjog vo do tahzīboñ kā

vo ek taḌap vo ek lagan kuchh khone kī kuchh paane kī

vo ek talab do rūhoñ ke ik qālib meñ Dhal jaane kī

do sham.oñ kī lau pechāñ jaise ik sho.ala-e-nau ban jaane kī

do dhāreñ jaise madirā kī bhartī hui kisī paimāne kī

yuuñ ek tajallī jaag uThī nazroñ meñ haqīqat vāloñ kī

jis tarah hadeñ mil jaatī hoñ do samt se do ujyāloñ kī

āvāza-e-haq jab lahrā kar bhagTī kā tarāna bantā hai

ye rabt-e-baham ye jazb-e-darūñ ḳhud ek zamāna bantā hai

chishtī kā qutub kā har na.ara yak-rangī meñ Dhal jaatā hai

har dil pe kabīr aur tulsī ke dohoñ kā fusūñ chal jaatā hai

nānak kā kabit ban jaatī hai miirā kā bhajan ban jaatā hai

dil dil se jo ham āhang hue atvār mile andāz mile

ik aur zabāñ ta.amīr huī alfāz se jab alfāz mile

ye fikr o bayāñ kī ra.anā.ī duniyā-e-adab kī jaan banī

ye 'mīr' kā fan 'chakbast' kī lai 'ġhālib' kā amar dīvān banī

tahzīb kī is yak-jehtī ko urdu kī shahādat kaafī hai

kuchh aur nishāñ bhī milte haiñ thoḌī sī basīrat kaafī hai

ta.amīr ke parde meñ bhī ka.ī be-laus fusūñ mil jaate haiñ

ran-pūr ke mandir meñ ham ko masjid ke sutūñ mil jaate haiñ

vahdat kī isī chiñgārī se dil mom huā hai patthar kā

ajmer kī jāma.a masjid meñ ḳhud aks hai ajnabī mandar kā

phir aur zarā ye fan baḌh kar mānind-e-ġhazal ban jaatā hai

marmar kī ru-pahlī chāñdī se ik tāj-mahal ban jaatā hai

ye naqsh baham tahzīboñ kā maujūd hai sau tasvīroñ meñ

'mansūr' 'manohar' 'daulat' aur 'hāshim' kī subuk tahrīroñ meñ

dil saath dhaḌakte aa.e haiñ ḳhud saaz patā de dete haiñ

tartīb suroñ kī kaise huī ḳhud raag sadā de dete haiñ

is vaqt bhī jab ik mutrib ke hoñToñ pe ḳhayāl aa jaatā hai

sangat kī devī ke ruḳh par ik baar jamāl aa jaatā hai

Thumrī kī rasīlī tānoñ se naġhmoñ kī ghaTā.eñ aatī haiñ

chhiḌtā hai sitār ab bhī jo kahīñ ḳhusrav kī sadā.eñ aa.ī haiñ

salme kī damak kuchh kahtī hai raqqās ke rangīñ joḌe meñ

ik guuñj na.e andāz kī hai katthak ke dhamakte toḌe meñ

murlī kī suhānī sangat ko tā.ūs-o-rabāb aa jaate haiñ

champā ke mahakte pahlū meñ ḳhush-rang gulāb aa jaate haiñ

zehnoñ kī tahoñ meñ aaj bhī hai lahrā vo hasīñ shahnā.ī kā

akbar ke javāñ kāñdhe pe sajā jab Dolā jodhā-bā.ī kā

har diin se baḌh kar vo rishta ulfat kī junūñ-sāmānī kā

chehre se saraktā vo ghuñghaT tāroñ se hasīñ mastānī kā

aapas kī ye baḌhtī yak-jihatī ik moḌ pe jab ruk jaatī hai

insān ke aage insāñ kī ik baar nazar jhuk jaatī hai

ai arz-e-vatan maġhmūm na ho phir pyaar ke chashme phūTeñge

ye nasl-o-nasab ke paimāne ye zaat ke darpan TūTeñge

zehnoñ kī ghuTan miT jā.egī insāñ meñ tafakkur jāgegā

kal ek mukammal vahdat kā bebāk tasavvur jāgegā

ta.amīr na.ī vahdat hogī mānavtā kī buniyādoñ par

ai arz-e-vatan vishvās to kar ik baar hamāre va.adoñ par

is vahdat is yak-jihatī kī ta.amīr kā din ham lā.eñge

sadiyoñ ke sunahre ḳhvāboñ kī ta.abīr kā din ham lā.eñge

ye desh ki hindu aur muslim tahzibon ka shiraaza hai

sadiyon ki purani baat hai ye par aaj bhi kitni taza hai

tariKH hai is ki ek amal tahlilon ka tarkibon ka

sambandh wo do aadarshon ka sanjog wo do tahzibon ka

wo ek taDap wo ek lagan kuchh khone ki kuchh pane ki

wo ek talab do ruhon ke ek qalib mein Dhal jaane ki

do shamon ki lau pechan jaise ek shoala-e-nau ban jaane ki

do dhaaren jaise madira ki bharti hui kisi paimane ki

yun ek tajalli jag uThi nazron mein haqiqat walon ki

jis tarah haden mil jati hon do samt se do ujyalon ki

aawaza-e-haq jab lahra kar bhagTi ka tarana banta hai

ye rabt-e-baham ye jazb-e-darun KHud ek zamana banta hai

chishti ka qutub ka har nara yak-rangi mein Dhal jata hai

har dil pe kabir aur tulsi ke dohon ka fusun chal jata hai

nanak ka kabit ban jati hai mera ka bhajan ban jata hai

dil dil se jo hum aahang hue atwar mile andaz mile

ek aur zaban tamir hui alfaz se jab alfaz mile

ye fikr o bayan ki ranai duniya-e-adab ki jaan bani

ye 'mir' ka fan 'chakbast' ki lai 'ghaalib' ka amar diwan bani

tahzib ki is yak-jehti ko urdu ki shahadat kafi hai

kuchh aur nishan bhi milte hain thoDi si basirat kafi hai

tamir ke parde mein bhi kai be-laus fusun mil jate hain

ran-pur ke mandir mein hum ko masjid ke sutun mil jate hain

wahdat ki isi chingari se dil mom hua hai patthar ka

ajmer ki jama masjid mein KHud aks hai ajnabi mandar ka

phir aur zara ye fan baDh kar manind-e-ghazal ban jata hai

marmar ki ru-pahli chandi se ek taj-mahal ban jata hai

ye naqsh baham tahzibon ka maujud hai sau taswiron mein

'mansur' 'manohar' 'daulat' aur 'hashim' ki subuk tahriron mein

dil sath dhaDakte aae hain KHud saz pata de dete hain

tartib suron ki kaise hui KHud rag sada de dete hain

is waqt bhi jab ek mutrib ke honTon pe KHayal aa jata hai

sangat ki dewi ke ruKH par ek bar jamal aa jata hai

Thumri ki rasili tanon se naghmon ki ghaTaen aati hain

chhiDta hai sitar ab bhi jo kahin KHusraw ki sadaen aai hain

salme ki damak kuchh kahti hai raqqas ke rangin joDe mein

ek gunj nae andaz ki hai katthak ke dhamakte toDe mein

murli ki suhani sangat ko taus-o-rabab aa jate hain

champa ke mahakte pahlu mein KHush-rang gulab aa jate hain

zehnon ki tahon mein aaj bhi hai lahra wo hasin shahnai ka

akbar ke jawan kandhe pe saja jab Dola jodha-bai ka

har din se baDh kar wo rishta ulfat ki junun-samani ka

chehre se sarakta wo ghunghaT taron se hasin mastani ka

aapas ki ye baDhti yak-jihati ek moD pe jab ruk jati hai

insan ke aage insan ki ek bar nazar jhuk jati hai

ai arz-e-watan maghmum na ho phir pyar ke chashme phuTenge

ye nasl-o-nasab ke paimane ye zat ke darpan TuTenge

zehnon ki ghuTan miT jaegi insan mein tafakkur jagega

kal ek mukammal wahdat ka bebak tasawwur jagega

tamir nai wahdat hogi manawta ki buniyaadon par

ai arz-e-watan wishwas to kar ek bar hamare wadon par

is wahdat is yak-jihati ki tamir ka din hum laenge

sadiyon ke sunahre KHwabon ki tabir ka din hum laenge