izhaar-e-mohabbat ek pahaDi rasta hai

use bas ek hī zid hai

maiñ us kī zaat se mansūb

apne ḳhayāloñ kā koī paikar tarāshūñ

aur us ke sāmne rakh duuñ

use batlā.ūñ maiñ us se mujhe kitnī mohabbat hai

use kaise batā.ūñ maiñ

zamīñ se āsmāñ tak is muhīt-e-be-karāñ ko

apnī muTThī meñ jakaḌnā mere bas meñ hī nahīñ hai

mire sar par chamakte mehrbāñ sūraj kī kirnoñ kā

koī bhī goshvāra ban nahīñ saktā

zamīñ kī god meñ kitne samundar haiñ

kināroñ par namīda ret ke zarrāt haiñ

maiñ un ko adadī dastaras meñ kis tarah kar luuñ

bhalā maiñ lā-makāñ kī vus.atoñ ko

is makāñ meñ kis tarah lā.ūñ

jo qudrat ne hamesha an-kahā rakkhā

us ko kis tarah kah duuñ

ki titlī ko pakaḌ lene kā

ḳhushbū ko jakaḌ lene kā

fan mujh ko nahīñ aatā

use kaise batā.ūñ maiñ

ki iz.hār-e-mohabbat ik pahāḌī rāsta hai

aur choTī tak pahuñchne kā mujhe gur hī nahīñ aatā

use bas ek hi zid hai

main us ki zat se mansub

apne KHayalon ka koi paikar tarashun

aur us ke samne rakh dun

use batlaun main us se mujhe kitni mohabbat hai

use kaise bataun main

zamin se aasman tak is muhit-e-be-karan ko

apni muTThi mein jakaDna mere bas mein hi nahin hai

mere sar par chamakte mehrban suraj ki kirnon ka

koi bhi goshwara ban nahin sakta

zamin ki god mein kitne samundar hain

kinaron par namida ret ke zarraat hain

main un ko adadi dastaras mein kis tarah kar lun

bhala main la-makan ki wusaton ko

is makan mein kis tarah laun

jo qudrat ne hamesha an-kaha rakkha

us ko kis tarah kah dun

ki titli ko pakaD lene ka

KHushbu ko jakaD lene ka

fan mujh ko nahin aata

use kaise bataun main

ki izhaar-e-mohabbat ek pahaDi rasta hai

aur choTi tak pahunchne ka mujhe gur hi nahin aata