jaDe ki raat

kyā kahūñ tum se baat jaaḌe kī

lambī hotī hai raat jaaḌe kī

niiñd ik baar jab uchaTtī hai

baḌī mushkil se raat kaTtī hai

log āñkhoñ ko band karte haiñ

jāgnā nā-pasand karte haiñ

ḳhuub karvaT pe lete haiñ karvaT

niiñd aa.e kisī tarah jhaT-paT

vo kabhī oḌhnā razā.ī kā

vaah kyā kahnā is safā.ī kā

hai ye matlab ki jī na ghabrā.e

chain se so.eñ niiñd aa jaa.e

magar aisī ghaḌī uḌī thī niiñd

sub.h tak phir zarā na aa.ī niiñd

ban sañvar kar bahut paḌe lekin

jāgte jāgte chaḌh aayā din

masjidoñ meñ azaan hone lagī

jalva-gar din kī shaan hone lagī

murġh ab bolte haiñ kūkḌūñ kuuñ

aur kabūtar bhī karte haiñ ġhaT guuñ

kyā sabab niiñd kyoñ uchaTtī hai

raat kyoñ mushkiloñ se kaTtī hai

baat ye hai jo haiñ nikamme log

kaam kā pālte nahīñ haiñ rog

un ko matlab nahīñ kitāboñ se

raat ko vo sabaq nahīñ paḌhte

shaam hī se vo leT rahte haiñ

baat sunte haiñ aur na kahte haiñ

lambī hotī hai raat jāḌoñ kī

niiñd bhar kar hai aañkh khul jaatī

jaag kar phir vo sub.h karte haiñ

jaisī karte haiñ vaisī bharte haiñ

kya kahun tum se baat jaDe ki

lambi hoti hai raat jaDe ki

nind ek bar jab uchaTti hai

baDi mushkil se raat kaTti hai

log aankhon ko band karte hain

jagna na-pasand karte hain

KHub karwaT pe lete hain karwaT

nind aae kisi tarah jhaT-paT

wo kabhi oDhna razai ka

wah kya kahna is safai ka

hai ye matlab ki ji na ghabrae

chain se soen nind aa jae

magar aisi ghaDi uDi thi nind

subh tak phir zara na aai nind

ban sanwar kar bahut paDe lekin

jagte jagte chaDh aaya din

masjidon mein azan hone lagi

jalwa-gar din ki shan hone lagi

murgh ab bolte hain kukDun kun

aur kabutar bhi karte hain ghaT gun

kya sabab nind kyon uchaTti hai

raat kyon mushkilon se kaTti hai

baat ye hai jo hain nikamme log

kaam ka palte nahin hain rog

un ko matlab nahin kitabon se

raat ko wo sabaq nahin paDhte

sham hi se wo leT rahte hain

baat sunte hain aur na kahte hain

lambi hoti hai raat jaDon ki

nind bhar kar hai aankh khul jati

jag kar phir wo subh karte hain

jaisi karte hain waisi bharte hain