jadu ke piTare sa waqt

jaadū ke piTāre sā ye vaqt

jabki sub.h aur shaam ke biich

kitnā kuchh ghaT jaatā hai duniyā meñ

jis se hameñ nahīñ hotā koī ḳhaas vāsta

phir bhī ham sochte haiñ us par

bāteñ bhī karte haiñ kabhī-kabhār

jabki hamāre biich

sūkhe dinoñ aur siilī rātoñ kī anant vīrāniyāñ haiñ

jo suune parbatoñ aur sust nadiyoñ

banjar khetoñ aur murjhā.e jañgaloñ

aur un par TakTakī bāñdhe

udaas āñkhoñ ke bahishkrit ekānt se

chup-chāp utar aa.ī haiñ

jabki duur

retīlī sarhadoñ ko chhūkar

aane vaalī garm havā ke biich

tum se duur hone kā dard

palaT palaT kar ho jaatā hai gāḌhā

maiñ in parbatoñ nadiyoñ khetoñ jañgaloñ

aur udaas āñkhoñ ke

kitnā qarīb hotā huuñ

jaadū ke piTāre sā ye vaqt

jaise chhoḌtā hai

āshchrya kī ātish-bāziyāñ

jab tum bāteñ kartī ho

maiñ jaise bhīgtā huuñ svaroñ kī bārish meñ

aur tumārī chuppī se phūTte haiñ

kitne na.e shabd

jin ke binā barsoñ se adhūrī paḌī thiiñ

merī kitnī hī bāteñ

aur tumhārī tasvīreñ

jaise rah-rah aur palaTtī haiñ

smirtiyoñ kī purānī kitāb

jis meñ ghule the kabhī

tumhārī adāoñ ke ma.asūm rang

aur tumhārī kifāyatī hañsī

jaise ḳhushbū ke kisī gumrāh jhoñke sī

sameTtī mujhe apne narm ghere meñ

yuuñ dhartī ke is hisse meñ

yeh shāḳh se TūTte piile pattoñ kā mausam hai

peḌoñ par ābād haiñ chamgādaḌ aur kaale kavve

phir bhī yeh vaqt

mere kamre kī dīvāroñ par aksar khilā jaatā hai

gulmohar aur amaltās ke sundar phuul

aur tab maiñ sach-much jaan letā huuñ

ki merī yaad

tumhārī āñkhoñ meñ

ropne lagī hai motī

tum se duur maiñ aksar kholtā huuñ

vaqt ke is jāduī piTāre ko

chuntā huuñ shabd svar rang ḳhushbū aur motī

aur phir

jaise kisī bachkānī zid meñ

un par jagmag ummīdoñ kā āsmānī varaq chaḌhā

rakh detā huuñ zindagī kī chaukhaT par

jāduī piTāre sā ye vaqt

shāyad tumheñ bhī kabhī yeh batātā ho

ki tum se duur bhī

maiñ kitnā tayyār hotā huuñ

is mushkil duniyā kā sāmnā karne ke liye

jadu ke piTare sa ye waqt

jabki subh aur sham ke bich

kitna kuchh ghaT jata hai duniya mein

jis se hamein nahin hota koi KHas wasta

phir bhi hum sochte hain us par

baaten bhi karte hain kabhi-kabhaar

jabki hamare bich

sukhe dinon aur sili raaton ki anant viraniyan hain

jo sune parbaton aur sust nadiyon

banjar kheton aur murjhae jangalon

aur un par TakTaki bandhe

udas aankhon ke bahishkrit ekant se

chup-chap utar aai hain

jabki dur

retili sarhadon ko chhukar

aane wali garm hawa ke bich

tum se dur hone ka dard

palaT palaT kar ho jata hai gaDha

main in parbaton nadiyon kheton jangalon

aur udas aankhon ke

kitna qarib hota hun

jadu ke piTare sa ye waqt

jaise chhoDta hai

aashchrya ki aatish-baziyan

jab tum baaten karti ho

main jaise bhigta hun swaron ki barish mein

aur tumari chuppi se phuTte hain

kitne nae shabd

jin ke bina barson se adhuri paDi thin

meri kitni hi baaten

aur tumhaari taswiren

jaise rah-rah aur palaTti hain

smirtiyon ki purani kitab

jis mein ghule the kabhi

tumhaari adaon ke masum rang

aur tumhaari kifayati hansi

jaise KHushbu ke kisi gumrah jhonke si

sameTti mujhe apne narm ghere mein

yun dharti ke is hisse mein

yeh shaKH se TuTte pile patton ka mausam hai

peDon par aabaad hain chamgadaD aur kale kawwe

phir bhi yeh waqt

mere kamre ki diwaron par aksar khila jata hai

gulmohar aur amaltas ke sundar phul

aur tab main sach-much jaan leta hun

ki meri yaad

tumhaari aankhon mein

ropne lagi hai moti

tum se dur main aksar kholta hun

waqt ke is jadui piTare ko

chunta hun shabd swar rang KHushbu aur moti

aur phir

jaise kisi bachkani zid mein

un par jagmag ummidon ka aasmani waraq chaDha

rakh deta hun zindagi ki chaukhaT par

jadui piTare sa ye waqt

shayad tumhein bhi kabhi yeh batata ho

ki tum se dur bhi

main kitna tayyar hota hun

is mushkil duniya ka samna karne ke liye