jadu ki Dibiya

suno chunnū munnū mire paas aao

shakīla jamīla ko bhī saath laao

ye dekho mire paas kyā aa ga.ī hai

ye chhoTī sī Dibiyā baḌe kaam kī hai

ye Dibiyā nahīñ mantaroñ kī chhaḌī hai

suno is meñ jaadū kī puḌiyā paḌī hai

ise jab ghumāv to duniyā ghumā.e

ye ghar baiThe baiThe siyāhat karā.e

ise khaTkhaTāo to ghuñghaT uThā.e

hameñ chāñd sī apnī sūrat dikhā.e

ise jab dabāo to ye gungunā.e

anokhe nirāle dhunoñ ko sunā.e

binā kuchh dabā.e bhī ye boltī hai

binā kuchh hilā.e bhī to Doltī hai

zarūrat ho jis kī ise ye bulā de

bulā kar use ham se bāteñ karā de

hameñ apne bichhḌoñ se ham ko milā de

hamāre diloñ meñ mohabbat jagā de

ye chāhe to jis se bhī jis ko milā de

kisī ko kisī se bhī chāhe bhiḌā de

kabhī ajnabī ko bhī sāthī banā de

kabhī dost ko bhī ye dushman banā de

kabhī jo sharārat ye karne pe aa.e

to chāhe jise raat din ye satā.e

tilismī fazā.eñ bhī is meñ chhupī haiñ

hazāroñ balā.eñ bhī is meñ dabī haiñ

kabhī to ye duniyā kā naqsha ubhāre

kabhī āsmāñ ko zamīñ par utāre

kahāñ kyā huā saarā qissa sunā.e

yahāñ kā vahāñ kā tamāsha dikhā.e

ye mashriq ko maġhrib se pal meñ milā.e

bas ik aan meñ dūriyoñ ko miTā.e

ye photo bhī to baiThe baiThe utāre

hamāre bhī chehre kā naqsha ubhāre

ye dekho tumhārā bhī photo khiñchā hai

tumhāre bhī chehroñ kā naqsha banā hai

nahīñ vaqt kā sirf chakkar chalā.e

ye Dibiyā to tārīḳh din bhī batā.e

alarm bhī to raat meñ ye bajā.e

hameñ vaqt par ġhaflatoñ se jagā.e

mire dil meñ kyā hai ise ye ḳhabar hai

mire dil ke andar bhī is kī nazar hai

ilah-dīn kā ye diyā to nahīñ hai

ki is meñ bhī to koī jin sā basā hai

ki jab bhī bulāo to dekho khaḌā hai

jo shai chāhiye is se hāzir kiyā hai

chhaḌī kī jhaḌī dekh bachche ye bole

bahut der ke baad muñh apnā khole

ye Dibiyā to sach-much baḌe kaam kī hai

hameñ bhī batāo kahāñ se milī hai

batāo ki is kā koī naam bhī hai

frē meñ milī hai yā kuchh daam bhī hai

suno chunnu munnu mere pas aao

shakila jamila ko bhi sath lao

ye dekho mere pas kya aa gai hai

ye chhoTi si Dibiya baDe kaam ki hai

ye Dibiya nahin mantaron ki chhaDi hai

suno is mein jadu ki puDiya paDi hai

ise jab ghumaw to duniya ghumae

ye ghar baiThe baiThe siyahat karae

ise khaTkhaTao to ghunghaT uThae

hamein chand si apni surat dikhae

ise jab dabao to ye gungunae

anokhe nirale dhunon ko sunae

bina kuchh dabae bhi ye bolti hai

bina kuchh hilae bhi to Dolti hai

zarurat ho jis ki ise ye bula de

bula kar use hum se baaten kara de

hamein apne bichhDon se hum ko mila de

hamare dilon mein mohabbat jaga de

ye chahe to jis se bhi jis ko mila de

kisi ko kisi se bhi chahe bhiDa de

kabhi ajnabi ko bhi sathi bana de

kabhi dost ko bhi ye dushman bana de

kabhi jo shararat ye karne pe aae

to chahe jise raat din ye satae

tilismi fazaen bhi is mein chhupi hain

hazaron balaen bhi is mein dabi hain

kabhi to ye duniya ka naqsha ubhaare

kabhi aasman ko zamin par utare

kahan kya hua sara qissa sunae

yahan ka wahan ka tamasha dikhae

ye mashriq ko maghrib se pal mein milae

bas ek aan mein duriyon ko miTae

ye photo bhi to baiThe baiThe utare

hamare bhi chehre ka naqsha ubhaare

ye dekho tumhaara bhi photo khincha hai

tumhaare bhi chehron ka naqsha bana hai

nahin waqt ka sirf chakkar chalae

ye Dibiya to tariKH din bhi batae

alarm bhi to raat mein ye bajae

hamein waqt par ghaflaton se jagae

mere dil mein kya hai ise ye KHabar hai

mere dil ke andar bhi is ki nazar hai

ilah-din ka ye diya to nahin hai

ki is mein bhi to koi jin sa basa hai

ki jab bhi bulao to dekho khaDa hai

jo shai chahiye is se hazir kiya hai

chhaDi ki jhaDi dekh bachche ye bole

bahut der ke baad munh apna khole

ye Dibiya to sach-much baDe kaam ki hai

hamein bhi batao kahan se mili hai

batao ki is ka koi nam bhi hai

free mein mili hai ya kuchh dam bhi hai