jadu nagri

zindagī kī talḳhiyāñ nākāmiyāñ TuuTe hue

ḳhvāboñ kī kircheñ

roz-o-shab ko muzmahil kar deñ

to mere saath aao

zarā Thahro

maiñ apnī jādū-nagrī kī jhalak dikhlā.ūñ tum ko

vo dekho kis tarah se āsmāñ ke canvas par bādaloñ kā raqs hotā hai

kabhī tum ne ghane jañgal meñ shāḳhoñ se Tapakte shabnamī motī nahīñ dekhe

kabhī sarmā kī rut meñ barf kī chādar pe bikhrī chāñd kī ruupā nahīñ dekhī

kabhī gandum ke khetoñ meñ ugā sonā nahīñ dekhā

kabhī ūñchī chaTānoñ kohsāroñ se ga.ī sadiyoñ ke afsāne sune tum ne

kisī gambhīr sāhil se nahīñ dekhā

ki kaise chīḳhtā biphrā samundar dhīre dhīre shānt hotā hai

kabhī ma.asūm bachchoñ kī hañsī ke nuqra.ī ghuñgrū sameTe haiñ

kabhī chāhat ke hoñToñ se kisī jalte hue māthe ko chūmā hai

zarā socho

ki tum ne maañ kī lorī kī halāvat

ḳhāndānoñ kī sharāfat

pyaar kī rāhat nahīñ paa.ī

zarā socho

ye saarī jādū-nagrī mehrbāñ duniyā tumhārī hai

zindagi ki talKHiyan nakaamiyan TuTe hue

KHwabon ki kirchen

roz-o-shab ko muzmahil kar den

to mere sath aao

zara Thahro

main apni jadu-nagri ki jhalak dikhlaun tum ko

wo dekho kis tarah se aasman ke canwas par baadalon ka raqs hota hai

kabhi tum ne ghane jangal mein shaKHon se Tapakte shabnami moti nahin dekhe

kabhi sarma ki rut mein barf ki chadar pe bikhri chand ki rupa nahin dekhi

kabhi gandum ke kheton mein uga sona nahin dekha

kabhi unchi chaTanon kohsaron se gai sadiyon ke afsane sune tum ne

kisi gambhir sahil se nahin dekha

ki kaise chiKHta biphra samundar dhire dhire shant hota hai

kabhi masum bachchon ki hansi ke nuqrai ghungru sameTe hain

kabhi chahat ke honTon se kisi jalte hue mathe ko chuma hai

zara socho

ki tum ne man ki lori ki halawat

KHandanon ki sharafat

pyar ki rahat nahin pai

zara socho

ye sari jadu-nagri mehrban duniya tumhaari hai