jaeza

apne ehsās ke ā.īne meñ ḳhud ko dekhā

ik simaTtā huā saaya huuñ bikhartā huā phuul

ek taptā huā sahrā huuñ sulagtā huā shahr

dard kā sarv-e-ravāñ dukh kā shajar dasht-e-ḳhulūs

ek fankār huuñ sarmāya mirā ḳhūn-e-jigar

zindagī bārhā sho.aloñ meñ giraftār huī

bārhā fikr-e-dil-o-jāñ bhī sharar-bār huī

apne māhaul ke me.aar pe ḳhud ko parkhā

ek mujrim huuñ mirā jurm vafā kī tash.hīr

azmat-e-zulm kā munkir huuñ shab-e-ġham kā harīf

ādamiyyat kā taqaddus hai mire fan kā jamāl

haq-parastī mire afkār kā sar-chashma hai

ek mushrik huuñ mirā shirk mohabbat sab se

ek kāfir huuñ mirā kufr sadāqat pe yaqīñ

ye dar-o-bām-e-havas tamkanat-e-qasr-e-sitam

raat kaT jā.egī khul jā.egā zulmat kā bharam

apne ehsas ke aaine mein KHud ko dekha

ek simaTta hua saya hun bikharta hua phul

ek tapta hua sahra hun sulagta hua shahr

dard ka sarw-e-rawan dukh ka shajar dasht-e-KHulus

ek fankar hun sarmaya mera KHun-e-jigar

zindagi barha shoalon mein giraftar hui

barha fikr-e-dil-o-jaan bhi sharar-bar hui

apne mahaul ke mear pe KHud ko parkha

ek mujrim hun mera jurm wafa ki tashhir

azmat-e-zulm ka munkir hun shab-e-gham ka harif

aadamiyyat ka taqaddus hai mere fan ka jamal

haq-parasti mere afkar ka sar-chashma hai

ek mushrik hun mera shirk mohabbat sab se

ek kafir hun mera kufr sadaqat pe yaqin

ye dar-o-baam-e-hawas tamkanat-e-qasr-e-sitam

raat kaT jaegi khul jaega zulmat ka bharam