jasus dost

aa idhar ai dost aa tū mujh se chhup saktā nahīñ

sa.ī-e-ḳhud-poshī hai kyoñ jab maiñ tujhe taktā nahīñ

garche pahle sūfiyāna svāñg ne dhokā diyā

lekin āñkhoñ kī chamak ne tujh ko pahchanvā diyā

terī āñkhoñ se ayaañ ab tak vo barqī lahar hai

qahr hai terī nigāh-e-tez haañ haañ qahr hai

al-amāñ ye terī āshufta-nigāhī al-amāñ

umr-o-ayyār kī bhī hech haiñ chālākiyāñ

kyoñ maiñ hairān huuñ jo har sū aaj terī dhuum hai

terī fitrat ibtidā se hī tujhe mālūm hai

tujh se mil kar aaj mujh ko madrasa yaad aa gayā

phir vo tiflī kā muraqqā dil mirā taḌpā gayā

mutma.in rahtī na thī terī nigāh-e-justujū

taur tere ārifāna narm terī guftugū

madrase meñ apne ham-umroñ se vo sargoshiyāñ

bar-mahal sargoshiyoñ ke baad vo ḳhāmoshiyāñ

ham-jamā.at dost kahte the tujhe apnā va.ada

tujh ko un ke ḳhāngī jhagḌoñ kī bhī thī justujū

yaad hai mujh se bhī kuchh pūchhā thā ik din ai sharīr

aur phir kahne lagā thā tū mujhe raushan zamīr

har kisī ustād kā tū muñh chaḌhā shāgird thā

naam terā vāqa.ī sab kī zabāñ kā vird thā

har kisī ustād kā tū muñh chaḌhā shāgird thā

naam terā vāqa.ī sab kī zabāñ kā vird thā

terī fitrat qābiliyyat tere kaam aa hī ga.ī

ġhair-mulkī hākimoñ tak tujh ko pahuñchā hī ga.ī

haiñ siyāh aḳhbār saare tere naam aur kaam se

shāyad ab tū aa rahā hai ḳhaas mulk-e-shām se

kar rahā hai sair-e-duniyā ban ke ab jāsūs tū

aah abnā-e-vatan se ḳhaak ho mānūs tū

aa idhar ai dost aa tu mujh se chhup sakta nahin

sai-e-KHud-poshi hai kyon jab main tujhe takta nahin

garche pahle sufiyana swang ne dhoka diya

lekin aankhon ki chamak ne tujh ko pahchanwa diya

teri aankhon se ayan ab tak wo barqi lahar hai

qahr hai teri nigah-e-tez han han qahr hai

al-aman ye teri aashufta-nigahi al-aman

umr-o-ayyar ki bhi hech hain chaalakiyan

kyon main hairan hun jo har su aaj teri dhum hai

teri fitrat ibtida se hi tujhe malum hai

tujh se mil kar aaj mujh ko madrasa yaad aa gaya

phir wo tifli ka muraqqa dil mera taDpa gaya

mutmain rahti na thi teri nigah-e-justuju

taur tere aarifana narm teri guftugu

madrase mein apne ham-umron se wo sargoshiyan

bar-mahal sargoshiyon ke baad wo KHamoshiyan

ham-jamaat dost kahte the tujhe apna wada

tujh ko un ke KHangi jhagDon ki bhi thi justuju

yaad hai mujh se bhi kuchh puchha tha ek din ai sharir

aur phir kahne laga tha tu mujhe raushan zamir

har kisi ustad ka tu munh chaDha shagird tha

nam tera waqai sab ki zaban ka wird tha

har kisi ustad ka tu munh chaDha shagird tha

nam tera waqai sab ki zaban ka wird tha

teri fitrat qabiliyyat tere kaam aa hi gai

ghair-mulki hakimon tak tujh ko pahuncha hi gai

hain siyah aKHbar sare tere nam aur kaam se

shayad ab tu aa raha hai KHas mulk-e-sham se

kar raha hai sair-e-duniya ban ke ab jasus tu

aah abna-e-watan se KHak ho manus tu