jab mohabbat kaDwe samundar mein Dub rahi ho

kyoñ tasavvur kiyā jaa.e

nāpaid havā meñ

ek mazbūt Dor se bañdhe

bahut se rang-birange ġhubāroñ kā

jo hameñ yahāñ se uḌā kar vahāñ le jā sakte hoñ

aur vahāñ se aage

phir aur bhī aage

kyoñ dekhā jaa.e

gadle āsmān par

dhuñdle sitāroñ ke darmiyān

chamakte hue chāñd ko

itnī der tak

ki vo ḳhushk kar de hamārī āñkhoñ kā paanī

kyoñ bāteñ kī jaa.eñ

apne poshīda baaġh ke

rañgā-rañg phūloñ ke darmiyān

lahlahāte surḳh gulāb se

yā sabz peḌoñ se

yā peḌoñ meñ chhupī madhur koyal se

kyoñ mohabbat kī jaa.e

jab log DhūñD rahe hoñ

dūsroñ ko mārne ke nit na.e asbāb

aur soch rahe hoñ

aziyyat-dahī ke nit na.e tarīqe

kyoñ na ḳhālī kiyā jaa.e

kaḌve samundar se bane zahr kā piyāla

jab mohabbat kaḌve samundar meñ Duub rahī ho

kyon tasawwur kiya jae

napaid hawa mein

ek mazbut Dor se bandhe

bahut se rang-birange ghubaron ka

jo hamein yahan se uDa kar wahan le ja sakte hon

aur wahan se aage

phir aur bhi aage

kyon dekha jae

gadle aasman par

dhundle sitaron ke darmiyan

chamakte hue chand ko

itni der tak

ki wo KHushk kar de hamari aankhon ka pani

kyon baaten ki jaen

apne poshida bagh ke

ranga-rang phulon ke darmiyan

lahlahate surKH gulab se

ya sabz peDon se

ya peDon mein chhupi madhur koyal se

kyon mohabbat ki jae

jab log DhunD rahe hon

dusron ko marne ke nit nae asbab

aur soch rahe hon

aziyyat-dahi ke nit nae tariqe

kyon na KHali kiya jae

kaDwe samundar se bane zahr ka piyala

jab mohabbat kaDwe samundar mein Dub rahi ho