jab tez bhuk lagi ho

jab tez bhuuk lagī ho

maiñ apne jism se khelnā shurūa kar detā huuñ

bahut saada sā khel hai ye

is khel meñ hamārā dil

baḌī āsānī se

ek phūlī huī chapātī meñ tabdīl ho jaatā hai

aur hamārā jism

nokīle dāñtoñ kī ek qatār meñ

shāyad aap kabhī is tajrabe se nahīñ guzre

shāyad kabhī aap kī āñteñ aiñTh kar dohrī nahīñ huiiñ

shāyad kabhī bhuuk se niDhāl ho kar

aap ke kisī daañt kī nok

aap ke apne hoñT meñ paivast nahīñ huī

shāyad aap kī zabān ne

apne ḳhuun kā zā.iqa nahīñ chakhā

ye bāteñ aap ke liye ajiib haiñ

shāyad nā-qābil-e-yaqīn bhī

lekin baḌī āsānī se har baat samajh aa jaatī hai

jab aadmī bhūkā ho

itnā bhūkā

ki ye andāza lagāne ke qābil hī na rahe

ki vo

roTī kī phūlī huī chapātī hai

yā bhuuk

jab tez bhuk lagi ho

main apne jism se khelna shurua kar deta hun

bahut sada sa khel hai ye

is khel mein hamara dil

baDi aasani se

ek phuli hui chapati mein tabdil ho jata hai

aur hamara jism

nokile danton ki ek qatar mein

shayad aap kabhi is tajrabe se nahin guzre

shayad kabhi aap ki aanten ainTh kar dohri nahin huin

shayad kabhi bhuk se niDhaal ho kar

aap ke kisi dant ki nok

aap ke apne honT mein paiwast nahin hui

shayad aap ki zaban ne

apne KHun ka zaiqa nahin chakha

ye baaten aap ke liye ajib hain

shayad na-qabil-e-yaqin bhi

lekin baDi aasani se har baat samajh aa jati hai

jab aadmi bhuka ho

itna bhuka

ki ye andaza lagane ke qabil hi na rahe

ki wo

roTi ki phuli hui chapati hai

ya bhuk