jab tere shahr se guzarta hun

kis tarah roktā huuñ ashk apne

kis qadar dil pe jabr kartā huuñ

aaj bhī kār-zār-e-hastī meñ

jab tire shahr se guzartā huuñ

is qadar bhī nahīñ mujhe ma.alūm

kis mohalle meñ hai makāñ terā

kaun sī shāḳh-e-gul pe raqsāñ hai

rashk-e-firdaus āshiyāñ terā

jaane kin vādiyoñ meñ utrā hai

ġhairat-e-husn kārvāñ terā

kis se pūchhūñgā maiñ ḳhabar terī

kaun batlā.egā nishāñ terā

terī rusvā.iyoñ se Dartā huuñ

jab tire shahr se guzartā huuñ

hāl-e-dil bhī na kah sakā garche

tū rahī muddatoñ qarīb mire

kuchh tirī azmatoñ kā Dar bhī thā

kuchh ḳhayālāt the ajiib mire

āḳhir-e-kār vo ghaḌī aa.ī

bār-var ho ga.e raqīb mire

tū mujhe chhoḌ kar chalī bhī ga.ī

ḳhair qismat mirī nasīb mire

ab maiñ kyuuñ tujh ko yaad kartā huuñ

jab tire shahr se guzartā huuñ

go zamāna tirī mohabbat kā

ek bhūlī huī kahānī hai

tere kūche meñ umr-bhar na ga.e

saarī duniyā kī ḳhaak chhānī hai

lazzat-e-vasl ho ki zaḳhm-e-firāq

jo bhī ho terī mehrbānī hai

kis tamannā se tujh ko chāhā thā

kis mohabbat se haar maanī hai

apnī qismat pe naaz kartā huuñ

jab tire shahr se guzartā huuñ

ashk palkoñ pe aa nahīñ sakte

dil meñ hai terī aabrū ab bhī

tujh se raushan hai kā.enāt mirī

tere jalve haiñ chār-sū ab bhī

apne ġham-ḳhāna-e-taḳhayyul meñ

tujh se hotī hai guftugū ab bhī

tujh ko vīrāna-e-tasvvur meñ

dekh letā huuñ rū-ba-rū ab bhī

ab bhī maiñ tujh ko pyaar kartā huuñ

jab tire shahr se guzartā huuñ

aaj bhī kār-zār-e-hastī meñ

tū agar ek baar mil jaa.e

kisī mahfil meñ sāmnā ho jaa.e

yā sar-e-rahguzār mil jaa.e

ik nazar dekh le mohabbat se

ek lamhe kā pyaar mil jaa.e

ārzūoñ ko chain aa jaa.e

hasratoñ ko qarār mil jaa.e

jaane kyā kyā ḳhayāl kartā huuñ

jab tire shahr se guzartā huuñ

aaj maiñ aise maqām par huuñ jahāñ

rasan-o-dār kī bulandī hai

mere ash.ār kī latāfat meñ

tere kirdār kī bulandī hai

terī majbūriyoñ kī azmat hai

mere īsār kī bulandī hai

sab tire dard kī ināyat hai

sab tire pyaar kī bulandī hai

tere ġham se nibāh kartā hai

jab tire shahr se guzartā huuñ

tujh se koī gila nahīñ mujh ko

maiñ tujhe bevafā nahīñ kahtā

terā milnā ḳhayāl-o-ḳhvāb huā

phir bhī nā-āshnā nahīñ kahtā

vo jo kahtā thā mujh ko āvāra

maiñ use bhī burā nahīñ kahtā

varna ik be-navā mohabbat meñ

dil ke luTne pe kyā nahīñ kahtā

maiñ to mushkil se aah bhartā huuñ

jab tire shahr se guzartā huuñ

koī pursān-e-hāl ho to kahūñ

kaisī āñdhī chalī hai tere baa'd

din guzārā hai kis tarah maiñ ne

raat kaise Dhalī hai tere baa'd

sham-e-ummīd sarsar-e-ġham meñ

kis bahāne jalī hai tere baa'd

jis meñ koī makīñ na rahtā ho

dil vo suunī galī hai tere baa'd

roz jiitā huuñ roz martā huuñ

jab tire shahr se guzartā huuñ

lekin ai sākin-e-harīm-e-ḳhayāl

yaad hai daur-e-kaif-o-kam ki nahīñ

kyā kabhī tere dil pe guzrā hai

merī mahrūmiyoñ kā ġham ki nahīñ

merī barbādiyoñ kā sun kar haal

aañkh terī huī hai nam ki nahīñ

aur is kār-zār-e-hastī meñ

phir kabhī mil sakeñge ham ki nahīñ

Darte Darte savāl kartā huuñ

jab tire shahr se guzartā huuñ

kis tarah rokta hun ashk apne

kis qadar dil pe jabr karta hun

aaj bhi kar-zar-e-hasti mein

jab tere shahr se guzarta hun

is qadar bhi nahin mujhe malum

kis mohalle mein hai makan tera

kaun si shaKH-e-gul pe raqsan hai

rashk-e-firdaus aashiyan tera

jaane kin wadiyon mein utra hai

ghairat-e-husn karwan tera

kis se puchhunga main KHabar teri

kaun batlaega nishan tera

teri ruswaiyon se Darta hun

jab tere shahr se guzarta hun

haal-e-dil bhi na kah saka garche

tu rahi muddaton qarib mere

kuchh teri azmaton ka Dar bhi tha

kuchh KHayalat the ajib mere

aaKHir-e-kar wo ghaDi aai

bar-war ho gae raqib mere

tu mujhe chhoD kar chali bhi gai

KHair qismat meri nasib mere

ab main kyun tujh ko yaad karta hun

jab tere shahr se guzarta hun

go zamana teri mohabbat ka

ek bhuli hui kahani hai

tere kuche mein umr-bhar na gae

sari duniya ki KHak chhani hai

lazzat-e-wasl ho ki zaKHm-e-firaq

jo bhi ho teri mehrbani hai

kis tamanna se tujh ko chaha tha

kis mohabbat se haar mani hai

apni qismat pe naz karta hun

jab tere shahr se guzarta hun

ashk palkon pe aa nahin sakte

dil mein hai teri aabru ab bhi

tujh se raushan hai kaenat meri

tere jalwe hain chaar-su ab bhi

apne gham-KHana-e-taKHayyul mein

tujh se hoti hai guftugu ab bhi

tujh ko virana-e-taswwur mein

dekh leta hun ru-ba-ru ab bhi

ab bhi main tujh ko pyar karta hun

jab tere shahr se guzarta hun

aaj bhi kar-zar-e-hasti mein

tu agar ek bar mil jae

kisi mahfil mein samna ho jae

ya sar-e-rahguzar mil jae

ek nazar dekh le mohabbat se

ek lamhe ka pyar mil jae

aarzuon ko chain aa jae

hasraton ko qarar mil jae

jaane kya kya KHayal karta hun

jab tere shahr se guzarta hun

aaj main aise maqam par hun jahan

rasan-o-dar ki bulandi hai

mere ashaar ki latafat mein

tere kirdar ki bulandi hai

teri majburiyon ki azmat hai

mere isar ki bulandi hai

sab tere dard ki inayat hai

sab tere pyar ki bulandi hai

tere gham se nibah karta hai

jab tere shahr se guzarta hun

tujh se koi gila nahin mujh ko

main tujhe bewafa nahin kahta

tera milna KHayal-o-KHwab hua

phir bhi na-ashna nahin kahta

wo jo kahta tha mujh ko aawara

main use bhi bura nahin kahta

warna ek be-nawa mohabbat mein

dil ke luTne pe kya nahin kahta

main to mushkil se aah bharta hun

jab tere shahr se guzarta hun

koi pursan-e-haal ho to kahun

kaisi aandhi chali hai tere ba'd

din guzara hai kis tarah main ne

raat kaise Dhali hai tere ba'd

sham-e-ummid sarsar-e-gham mein

kis bahane jali hai tere ba'd

jis mein koi makin na rahta ho

dil wo suni gali hai tere ba'd

roz jita hun roz marta hun

jab tere shahr se guzarta hun

lekin ai sakin-e-harim-e-KHayal

yaad hai daur-e-kaif-o-kam ki nahin

kya kabhi tere dil pe guzra hai

meri mahrumiyon ka gham ki nahin

meri barbaadiyon ka sun kar haal

aankh teri hui hai nam ki nahin

aur is kar-zar-e-hasti mein

phir kabhi mil sakenge hum ki nahin

Darte Darte sawal karta hun

jab tere shahr se guzarta hun