jabr

maiñ apne hisse kī har laḌā.ī to laḌ chukā huuñ

magar maiñ aisī laḌā.iyāñ aaj laḌ rahā huuñ

ki jo musallat huī haiñ mujh par

ki jo nahīñ thiiñ mirī

magar mujh pe farz kar diiñ

mu'āshre ne

mu’āshra jo ki aa chukā thā vujūd meñ

mere paidā hone se qabl

jis se farār mumkin nahīñ hai merā

rivāyatoñ aur falsafoñ ke

tamām duniyā ke maz.haboñ ke 'ibādatoñ ke

taqaddusoñ kī hazāroñ aisī laḌā.iyāñ

kab se laḌ rahā huuñ

nibhā rahā huuñ laḌā.iyāñ

mere sar ke bāloñ ke naam par

merī dāḌhī mūñchhoñ ke

mū-e-'āna ke naam par

mere khāne piine ke

paḌhne likhne ke naam par bhī

libās par be-libāsī par bhī

ki merī us kī shabīna 'uryāniyoñ kī ḳhātir bhī

laḌ rahā huuñ laḌā.iyāñ be-natīja

ab tak ba-hālat-e-jang huuñ

guzishta kī saarī nasloñ ke

aur mere hī jānashīnoñ ke

mustaqil ijtimā'ī jabr-o-sitam kā hai sāmnā

tasalsul se kar rahā huuñ muqābla

taaki mere afkār

sirf mere liye to

mahfūz rah sakeñ kam se kam

main apne hisse ki har laDai to laD chuka hun

magar main aisi laDaiyan aaj laD raha hun

ki jo musallat hui hain mujh par

ki jo nahin thin meri

magar mujh pe farz kar din

mu'ashre ne

mu’ashra jo ki aa chuka tha wujud mein

mere paida hone se qabl

jis se farar mumkin nahin hai mera

riwayaton aur falsafon ke

tamam duniya ke mazhabon ke 'ibaadaton ke

taqadduson ki hazaron aisi laDaiyan

kab se laD raha hun

nibha raha hun laDaiyan

mere sar ke baalon ke nam par

meri daDhi munchhon ke

mu-e-'ana ke nam par

mere khane pine ke

paDhne likhne ke nam par bhi

libas par be-libasi par bhi

ki meri us ki shabina 'uryaniyon ki KHatir bhi

laD raha hun laDaiyan be-natija

ab tak ba-haalat-e-jang hun

guzishta ki sari naslon ke

aur mere hi jaanashinon ke

mustaqil ijtima'i jabr-o-sitam ka hai samna

tasalsul se kar raha hun muqabla

taki mere afkar

sirf mere liye to

mahfuz rah saken kam se kam