jaddai

vo soz-o-sāz-e-mohabbat vo pur-fusūñ rāteñ

vo halkā halkā tarannum vo jāñ-fazā bāteñ

vo naddiyoñ kā talātum vo pattharoñ kā ḳharosh

vo māhtāb-e-javāñ zard pur-sukūñ ḳhāmosh

vo bahke bahke manāzir fusūñ-navāz havā

vo nīl-kañTh vo chashme pe shārkoñ kī sadā

tilism-e-ahd-e-mohabbat kī mad-bharī rāheñ

vafūr-e-kaif-o-junūñ kī hasīñ jilau-gāheñ

mire jahān-e-mohabbat kī yādgāreñ haiñ

surūd-o-sher-o-taġhazzul kī rahguzāreñ haiñ

nigāh-e-shauq vo andāz-e-pur-fusūñ ya.anī

na.e na.e vo matālib vo jazb-e-bā-ma.anī

vo tarz-e-ḳhās vo aqdār kī na.ī bāteñ

vo tajrabāt vo afkār kī na.ī bāteñ

taḳhaiyyulāt kī duniyā ko jagmagātī thiiñ

tasavvurāt kī āñkhoñ pe kauñd jaatī thiiñ

agarche aane ko aatī haiñ chaudhvīñ rāteñ

jhijak jhijak ke nigāhoñ meñ pur-fusūñ bāteñ

vo soz-o-sāz-e-mohabbat kī jaan ban ban kar

surūd-o-sher hasīñ pāyaloñ se chhan chhan kar

vo chāñdnī kī hasīñ vādiyoñ meñ raqsāñ haiñ

vo daur-e-paikar-e-rūmāñ junūñ-ba-dāmāñ haiñ

vo sāhirāna tarānoñ ko gungunāte haiñ

vo shā.irāna tamannā ko gudgudāte haiñ

magar maiñ bekas-o-āvāra phirtā rahtā huuñ

qadam qadam pe sañbhaltā huuñ girtā rahtā huuñ

wo soz-o-saz-e-mohabbat wo pur-fusun raaten

wo halka halka tarannum wo jaan-faza baaten

wo naddiyon ka talatum wo pattharon ka KHarosh

wo mahtab-e-jawan zard pur-sukun KHamosh

wo bahke bahke manazir fusun-nawaz hawa

wo nil-kanTh wo chashme pe shaarkon ki sada

tilism-e-ahd-e-mohabbat ki mad-bhari rahen

wafur-e-kaif-o-junun ki hasin jilau-gahen

mere jahan-e-mohabbat ki yaadgaren hain

surud-o-sher-o-taghazzul ki rahguzaren hain

nigah-e-shauq wo andaz-e-pur-fusun yani

nae nae wo matalib wo jazb-e-ba-mani

wo tarz-e-KHas wo aqdar ki nai baaten

wo tajrabaat wo afkar ki nai baaten

taKHaiyyulat ki duniya ko jagmagati thin

tasawwuraat ki aankhon pe kaund jati thin

agarche aane ko aati hain chaudhwin raaten

jhijak jhijak ke nigahon mein pur-fusun baaten

wo soz-o-saz-e-mohabbat ki jaan ban ban kar

surud-o-sher hasin payalon se chhan chhan kar

wo chandni ki hasin wadiyon mein raqsan hain

wo daur-e-paikar-e-ruman junun-ba-daman hain

wo sahirana taranon ko gungunate hain

wo shairana tamanna ko gudgudate hain

magar main bekas-o-awara phirta rahta hun

qadam qadam pe sanbhalta hun girta rahta hun