jadid-tar

tujh se ik umr kā paimāñ thā magar merā nasīb

inqilābāt kā mahkūm huā jaatā hai

vo tasavvur jo ka.ī baar nikhārā maiñ ne

itnā mauhūm hai ma.adūm huā jaatā hai

terī āñkhoñ meñ jagā.e the sitāre maiñ ne

aur chhalkā.e the gāloñ meñ hayāoñ ke ayāġh

koī ehsās na thā vaqt kī gardish kā mujhe

varna kyā raat se miltā nahīñ sūraj kā surāġh

is chakā-chauñd meñ ab tujh ko pukārūñ kaise

sail-e-anvār meñ tāroñ kā guzar kyā hogā

tah-e-dāman jo charāġhoñ ko chhupā.e rakhūñ

sochtā huuñ ki phir anjām-e-safar kyā hogā

mujh ko āvāz na de vaqt ke sahrāoñ meñ

maiñ bahut duur bahut duur nikal aayā huuñ

maiñ ufuq par bhī nahīñ huuñ maiñ falak par bhī nahīñ

maiñ tire māzī-e-marhūm kā ik saaya huuñ

tujh se ek umr ka paiman tha magar mera nasib

inqilabaat ka mahkum hua jata hai

wo tasawwur jo kai bar nikhaara main ne

itna mauhum hai madum hua jata hai

teri aankhon mein jagae the sitare main ne

aur chhalkae the galon mein hayaon ke ayagh

koi ehsas na tha waqt ki gardish ka mujhe

warna kya raat se milta nahin suraj ka suragh

is chaka-chaund mein ab tujh ko pukarun kaise

sail-e-anwar mein taron ka guzar kya hoga

tah-e-daman jo charaghon ko chhupae rakhun

sochta hun ki phir anjam-e-safar kya hoga

mujh ko aawaz na de waqt ke sahraon mein

main bahut dur bahut dur nikal aaya hun

main ufuq par bhi nahin hun main falak par bhi nahin

main tere mazi-e-marhum ka ek saya hun