jahan-e-nau

mujhe ḳhudā ne ḳhilāfat kā sharaf baḳhshā hai

mire hī zer-e-nagīñ is jahāñ ko rakkhā hai

magar ajiib nizām-e-jahāñ kī hālat hai

mire hī dosh pe aalam kā bār-e-ḳhidmat hai

mashaqqateñ hī likhī haiñ mire muqaddar meñ

nahīñ sukūn kabhī mere qalb-e-muztar meñ

hai qasd ab ki karūñ ik jahān-e-nau ābād

rahūñ tafakkur-e-fardā-o-dosh se āzād

jahāñ ki kashmakash-e-zīst kā nishāñ na ho

hayāt-e-sabr-o-mashaqqat kā imtihān na ho

ye sar-zamīñ ye samundar ye āsmān na ho

darūn-e-dām-e-qafas merā āshiyān na ho

jahāñ ki ġham kī ghaTā ruuh pe na chhāne paa.e

jumūd ālam-e-ehsās par na aane paa.e

jahāñ ki nuur rahe mere dil kī bastī meñ

shabāb-o-sher ke jalve hoñ merī hastī meñ

vahāñ maiñ dil kī umañgoñ ke giit gā.uñgā

vahāñ maiñ husn ko apnā ḳhudā banā.ūñgā

mujhe KHuda ne KHilafat ka sharaf baKHsha hai

mere hi zer-e-nagin is jahan ko rakkha hai

magar ajib nizam-e-jahan ki haalat hai

mere hi dosh pe aalam ka bar-e-KHidmat hai

mashaqqaten hi likhi hain mere muqaddar mein

nahin sukun kabhi mere qalb-e-muztar mein

hai qasd ab ki karun ek jahan-e-nau aabaad

rahun tafakkur-e-farda-o-dosh se aazad

jahan ki kashmakash-e-zist ka nishan na ho

hayat-e-sabr-o-mashaqqat ka imtihan na ho

ye sar-zamin ye samundar ye aasman na ho

darun-e-dam-e-qafas mera aashiyan na ho

jahan ki gham ki ghaTa ruh pe na chhane pae

jumud aalam-e-ehsas par na aane pae

jahan ki nur rahe mere dil ki basti mein

shabab-o-sher ke jalwe hon meri hasti mein

wahan main dil ki umangon ke git gaunga

wahan main husn ko apna KHuda banaunga