jahan zad

ai hasan kūza-gar

tū ne jaanā ki maiñ

jism-o-jāñ ke ta.alluq kī raushan guzargāh se

ik jahāñ kā safar jhel kar us

rifāqat kī dahlīz tak aa.ī huuñ

ai hasan kaash tū jaan saktā

ki is sahn ḳhāna se dahlīz tak ke safar meñ

jahāñ zaad ko kyuuñ zamāne lage haiñ

hasan is safar meñ jahāñ zaad ko

ek ik gaam par vaqt ke tāziyāne lage haiñ

hasan vaqt mālik bhī hai devtā bhī

muhāfiz bhī hai aur ḳhvāja-sarā bhī

ye dekhā hai maiñ ne

ki jab bhī darīchoñ meñ taaza shagūfa khulā hai

havā se vo hans kar zarā sā gale bhī milā hai

to ḳhvāja-sarā kī nazar se kahāñ bach sakā hai

magar dekh mujh ko ki maiñ ne yahāñ Thiik nau saal tak

phuul kāḌhe haiñ ḳhvāboñ ke bistar pe lekin

abhī tak koī in pe soyā nahīñ

phuul taaza shagufta aur āzurda haiñ

maiñ ne nau saal sūrat-garī kī hai tere har ik lams kī

raat bhar maiñ ne āñkheñ bhigoī haiñ kūzoñ meñ.... aur sub.h dam

halaq ko tar kiyā āñsūoñ se bahut

ye masāfat ye nau saal kī be-mahābā masāfat

tire dar ke aage mujhe khīñch laa.ī

magar tū yahāñ chaak par apnī dhun meñ magan hai nigāheñ uThā

dekh to maiñ jahāñ zaad terī tire sāmne huuñ

magar tū ne sach hī kahā thā

zamāna jahāñ zaad vo chaak hai

jis pe mīna-o-jām-o-subū aur fānūs-o-gul-dāñ kī mānind

bante bigaḌte haiñ insāñ

so ab ham

jo sadiyoñ kī lambī masāfat se lauTe haiñ

to apne ranjūr kūzoñ meñ jhojhā huā hai

ye terā qusūr aur na merī ḳhatā hai

koī kūza-gar to hamārā bhī hogā

so ye us kī hikmat

ki us ne hameñ chaak par Dhālte vaqt

lamhoñ kā pher is nazākat se rakhā

ki ham apnī apnī jagah sirf shashdar khaḌe the

ka.ī dast-e-chābuk ke be-jān putle

mare aur tire darmiyāñ saj ga.e the

so ye us kī hikmat

magar vaqt is darja saffāk kyoñ hai

ye mashshāta-e-zindagī itnī chālāk kyoñ hai

mare aur tire darmiyāñ nau baras jis ne lā kar bichhā.e

ye nau saal kis taur maiñ ne bitā.e

ki sāhil se kashtī tak aate hue

jaise taḳhte ke hamrāh dil Dagmagā.e

vahī nau baras jo mire aur tire darmiyāñ

vaqt kī kirchiyāñ haiñ

zamāna bhī kaisī ajab kahkashāñ hai

ye duniyā.e sayyārgāñ hai ki jis meñ hazāroñ kavākib

musalsal kisī chaak par ghūmte haiñ

ye ajsām ke gird ajsām kā raqs hī zindagī hai mirī jaañ

mirī jaan tū chaak ke saath miTTī ke rishte ko pahchāntā thā

hasan tū ne miTī ke be-jān putloñ se

taḳhlīq ke jāñ-gusil marhaloñ meñ

sadā guftugū sau tarah guftugū kī

zahānat ke putle mohabbat ke ḳhāliq faqat ye batā de

ki tere anāsir ke ajzā-e-tarkīb meñ vāhima kaise aayā

hasan tū vahāñ jhoñpaḌe meñ

akelā gale mil ke royā thā kis se

labīb aur tū aur maiñ aur haqīqat meñ koī nahīñ thā

tarah vāhima mere lab mere gesū se lipTā rahā thā

labīb ek saayā jise tū ne rog apnī jaañ kā banāyā

ye saayā kahīñ gar haqīqat bhī hotā

to āḳhir ko tū is haqīqat se kyoñ be-ḳhabar thā

ki har jism ke saath ik āftāb aur mahtāb lāzim

ye taslīs qaa.em hai qaa.em rahegī

hasan meñ tire sāmne ā.īna thī

tire hijr aur vasl kā ā.īna

inhimāk o ta.alluq kī miTTī se gūñdhe hue jism ko

terī āñkhoñ kī hiddat ne chamkāyā thā

terī ḳhalvat kī hairat ne vo rañg o roġhan kiye the

ki ā.īne shashdar khaḌe rah ga.e the

magar terī ḳhalvat kī hairat meñ vahshat kā jo shā.iba thā

nigāhoñ se merī kahāñ chhup sakā thā

mare aur tire darmiyāñ vasl kī har ghaḌī meñ

na jaane kahāñ se vahī soḳhta baḳht terī

ki jo jāñ-fishānī ke shāloñ se dahke hue

zindagī ke abad tāb-e-tannūr par

ungliyāñ tere bachchoñ kī thāme khaḌī

bhuuk se barsar-e-jañg thī

jis ke nazdīk ye

tere kuuze tire fan tirī aag sab

merī āñkheñ mire phuul aur ḳhvāb sab

zindagī ke abad tāb-e-tannūr ke raakh the

terī is soḳhta baḳht ko kyā ḳhabar

jab zamīñ apne mehvar kī tajdīd meñ

harf-e-lā se guzar jā.egī

to hazāroñ baras baad bhī

ye azal ke gharoñdoñ kī miTTī meñ madfūn

phuul aur buuTe ye kuuze

aur un meñ unhī qaaf āñkhoñ se chhilke hue

surḳh paanī kī talchhaT

kisī kūza-gar ke javāñ lams se jī uThe to

jahāñ zaad us ke liye phir janm legī

aur nau baras raqs karte guzar jā.eñge

terī is soḳhta baḳht ko kyā ḳhabar

vo raat vo halab kī kārvāñ sirā kā hauz

jis ko maiñ ne jism-o-jān kī ḳhushbūeñ kashīd kar ke

qatra qatra nau baras meñ āñsuoñ se pur kiyā

vo ek raat sirf ek raat meñ tamām ḳhushk ho gayā

ham apne vasl kī tamāzatoñ meñ aise jal bujhe

ki raakh tak nahīñ bachchī

ye ek jaañ kī tishnagī

mujhe tujhe ba-yak zamāñ bhalā kahāñ kahāñ na khīñchtī phirī

magar ye tū ne kyā kahā

ki tere jaisī aurteñ jahāñ zaad

aisī uljhaneñ haiñ jin ko aaj tak koī nahīñ sulajh sakā

ki auratoñ kī zaat hai vo tanz apne aap par

javāb jin kā ham nahīñ

to phir ye jām-o-mīnā-o-subū-o-hauz-o-rūd niil

is zamīñ kī god meñ

azal kī harf-gīr tābnākī ke liye

kahīñ bhī kuchh baham nahīñ

ai hasan chaak par se zarā apnī nazreñ haTā

tū mire nau baras tak banā.e ga.e phuul to dekh le

phuul taaza shagufta aur āzurda haiñ

yuuñ na ho ki unheñ

bhuuk aur muflisī ke satā.e hue

mere bachche bhī nīlām kar aa.eñ jā kar kahīñ

tere kūzoñ kī mānind baġhdād meñ

ai hasan

dāman-e-vaqt par jitne phuul aur buuTe saje haiñ

jahāñ zaad kī zaḳhm poroñ ne rañg un meñ

apne junūñ ke bhare haiñ

ye tāvān haiñ champa.ī uñgliyoñ kā

tire jām-o-mīnā pe

jis ḳhāl-o-ḳhad kī nazākat kī parchhā.iyāñ thiiñ

tujhe kyā ḳhabar ye kin āñkhoñ kī bīnā.iyāñ thiiñ

hasan ye mohabbat

ki jis ko tirī soḳhta baḳht gardāntī hai

amīroñ kī baazī

to mere ta.iiñ ye amīroñ kī baazī kahāñ

sirf bāzīgarī thī

mohabbat hamesha se muflis kā sarmāya-e-jāñ rahī hai

yahī to vo pūñjī hai

jis tak amīroñ ke haath ab bhī pahuñche nahīñ haiñ

tujhe ye gumāñ thā

ki aurat

mohabbat kī baazī meñ be-jān patte kī sūrat

kisī dast-e-chābuk kī marhūn-e-minnat

vo is khel meñ ek mohre kī sūrat

ki jab jis ne chāhā

use ek ghar se uThā kar

kisī dūsre ghar kā mālik banāyā

ki aurat faqat ek patthar kī mūrat

ye tasvīr-e-hairat yūñhī chup khaḌī hai

yūñhī chup rahegī

magar yuuñ nahīñ hai

hasan tū ne dekhā ki maiñ

qaid-e-auhām o band-e-rivāyāt meñ

būḌhe attār yūsuf kī dukān par

apnī āñkheñ tujhe nazr kartī rahī

būḌhā attār vo kīmiyā-gar ki jis ne

zamānoñ ke jañgal se

chehroñ ke phuul aur buuTe chune

vo mujhe aur tujhe jāntā thā magar

maiñ ne bāzār meñ

tujh se āñkhoñ kā aur dil kā saudā kiyā

ai hasan mere ek ik darīche pe

kohna rivāyāt o zālim aqā.ed kā jañgal ugā thā

hasan

kaash to merī āñkhoñ se mere darīche ko taktā

to ye jaan saktā

jahāñ tū khaḌā thā vahāñ ek ik darz se

merī āñkheñ mirā jism

chhan chhan ke kaT kaT ke girtā rahā thā

ai hasan kuza-gar

tu ne jaana ki main

jism-o-jaan ke talluq ki raushan guzargah se

ek jahan ka safar jhel kar us

rifaqat ki dahliz tak aai hun

ai hasan kash tu jaan sakta

ki is sahn KHana se dahliz tak ke safar mein

jahan zad ko kyun zamane lage hain

hasan is safar mein jahan zad ko

ek ek gam par waqt ke taziyane lage hain

hasan waqt malik bhi hai dewta bhi

muhafiz bhi hai aur KHwaja-sara bhi

ye dekha hai main ne

ki jab bhi darichon mein taza shagufa khula hai

hawa se wo hans kar zara sa gale bhi mila hai

to KHwaja-sara ki nazar se kahan bach saka hai

magar dekh mujh ko ki main ne yahan Thik nau sal tak

phul kaDhe hain KHwabon ke bistar pe lekin

abhi tak koi in pe soya nahin

phul taza shagufta aur aazurda hain

main ne nau sal surat-gari ki hai tere har ek lams ki

raat bhar main ne aankhen bhigoi hain kuzon mein aur subh dam

halaq ko tar kiya aansuon se bahut

ye masafat ye nau sal ki be-mahaba masafat

tere dar ke aage mujhe khinch lai

magar tu yahan chaak par apni dhun mein magan hai nigahen uTha

dekh to main jahan zad teri tere samne hun

magar tu ne sach hi kaha tha

zamana jahan zad wo chaak hai

jis pe mina-o-jam-o-subu aur fanus-o-gul-dan ki manind

bante bigaDte hain insan

so ab hum

jo sadiyon ki lambi masafat se lauTe hain

to apne ranjur kuzon mein jhojha hua hai

ye tera qusur aur na meri KHata hai

koi kuza-gar to hamara bhi hoga

so ye us ki hikmat

ki us ne hamein chaak par Dhaalte waqt

lamhon ka pher is nazakat se rakha

ki hum apni apni jagah sirf shashdar khaDe the

kai dast-e-chabuk ke be-jaan putle

mare aur tere darmiyan saj gae the

so ye us ki hikmat

magar waqt is darja saffak kyon hai

ye mashshata-e-zindagi itni chaalak kyon hai

mare aur tere darmiyan nau baras jis ne la kar bichhae

ye nau sal kis taur main ne bitae

ki sahil se kashti tak aate hue

jaise taKHte ke hamrah dil Dagmagae

wahi nau baras jo mere aur tere darmiyan

waqt ki kirchiyan hain

zamana bhi kaisi ajab kahkashan hai

ye duniyae sayyargan hai ki jis mein hazaron kawakib

musalsal kisi chaak par ghumte hain

ye ajsam ke gird ajsam ka raqs hi zindagi hai meri jaan

meri jaan tu chaak ke sath miTTi ke rishte ko pahchanta tha

hasan tu ne miTi ke be-jaan putlon se

taKHliq ke jaan-gusil marhalon mein

sada guftugu sau tarah guftugu ki

zahanat ke putle mohabbat ke KHaliq faqat ye bata de

ki tere anasir ke ajza-e-tarkib mein wahima kaise aaya

hasan tu wahan jhonpaDe mein

akela gale mil ke roya tha kis se

labib aur tu aur main aur haqiqat mein koi nahin tha

tarah wahima mere lab mere gesu se lipTa raha tha

labib ek saya jise tu ne rog apni jaan ka banaya

ye saya kahin gar haqiqat bhi hota

to aaKHir ko tu is haqiqat se kyon be-KHabar tha

ki har jism ke sath ek aaftab aur mahtab lazim

ye taslis qaem hai qaem rahegi

hasan mein tere samne aaina thi

tere hijr aur wasl ka aaina

inhimak o talluq ki miTTi se gundhe hue jism ko

teri aankhon ki hiddat ne chamkaya tha

teri KHalwat ki hairat ne wo rang o roghan kiye the

ki aaine shashdar khaDe rah gae the

magar teri KHalwat ki hairat mein wahshat ka jo shaiba tha

nigahon se meri kahan chhup saka tha

mare aur tere darmiyan wasl ki har ghaDi mein

na jaane kahan se wahi soKHta baKHt teri

ki jo jaan-fishani ke shaalon se dahke hue

zindagi ke abad tab-e-tannur par

ungliyan tere bachchon ki thame khaDi

bhuk se barsar-e-jang thi

jis ke nazdik ye

tere kuze tere fan teri aag sab

meri aankhen mere phul aur KHwab sab

zindagi ke abad tab-e-tannur ke rakh the

teri is soKHta baKHt ko kya KHabar

jab zamin apne mehwar ki tajdid mein

harf-e-la se guzar jaegi

to hazaron baras baad bhi

ye azal ke gharondon ki miTTi mein madfun

phul aur buTe ye kuze

aur un mein unhi qaf aankhon se chhilke hue

surKH pani ki talchhaT

kisi kuza-gar ke jawan lams se ji uThe to

jahan zad us ke liye phir janm legi

aur nau baras raqs karte guzar jaenge

teri is soKHta baKHt ko kya KHabar

wo raat wo halab ki karwan sira ka hauz

jis ko main ne jism-o-jaan ki KHushbuen kashid kar ke

qatra qatra nau baras mein aansuon se pur kiya

wo ek raat sirf ek raat mein tamam KHushk ho gaya

hum apne wasl ki tamazaton mein aise jal bujhe

ki rakh tak nahin bachchi

ye ek jaan ki tishnagi

mujhe tujhe ba-yak zaman bhala kahan kahan na khinchti phiri

magar ye tu ne kya kaha

ki tere jaisi aurten jahan zad

aisi uljhanen hain jin ko aaj tak koi nahin sulajh saka

ki auraton ki zat hai wo tanz apne aap par

jawab jin ka hum nahin

to phir ye jam-o-mina-o-subu-o-hauz-o-rud nil

is zamin ki god mein

azal ki harf-gir tabnaki ke liye

kahin bhi kuchh baham nahin

ai hasan chaak par se zara apni nazren haTa

tu mere nau baras tak banae gae phul to dekh le

phul taza shagufta aur aazurda hain

yun na ho ki unhen

bhuk aur muflisi ke satae hue

mere bachche bhi nilam kar aaen ja kar kahin

tere kuzon ki manind baghdad mein

ai hasan

daman-e-waqt par jitne phul aur buTe saje hain

jahan zad ki zaKHm poron ne rang un mein

apne junun ke bhare hain

ye tawan hain champai ungliyon ka

tere jam-o-mina pe

jis KHal-o-KHad ki nazakat ki parchhaiyan thin

tujhe kya KHabar ye kin aankhon ki binaiyan thin

hasan ye mohabbat

ki jis ko teri soKHta baKHt gardanti hai

amiron ki bazi

to mere tain ye amiron ki bazi kahan

sirf bazigari thi

mohabbat hamesha se muflis ka sarmaya-e-jaan rahi hai

yahi to wo punji hai

jis tak amiron ke hath ab bhi pahunche nahin hain

tujhe ye guman tha

ki aurat

mohabbat ki bazi mein be-jaan patte ki surat

kisi dast-e-chabuk ki marhun-e-minnat

wo is khel mein ek mohre ki surat

ki jab jis ne chaha

use ek ghar se uTha kar

kisi dusre ghar ka malik banaya

ki aurat faqat ek patthar ki murat

ye taswir-e-hairat yunhi chup khaDi hai

yunhi chup rahegi

magar yun nahin hai

hasan tu ne dekha ki main

qaid-e-auham o band-e-riwayat mein

buDhe attar yusuf ki dukan par

apni aankhen tujhe nazr karti rahi

buDha attar wo kimiya-gar ki jis ne

zamanon ke jangal se

chehron ke phul aur buTe chune

wo mujhe aur tujhe jaanta tha magar

main ne bazar mein

tujh se aankhon ka aur dil ka sauda kiya

ai hasan mere ek ek dariche pe

kohna riwayat o zalim aqaed ka jangal uga tha

hasan

kash to meri aankhon se mere dariche ko takta

to ye jaan sakta

jahan tu khaDa tha wahan ek ek darz se

meri aankhen mera jism

chhan chhan ke kaT kaT ke girta raha tha