jahan-zad

ai hasan-kūzā-gar

tū ne jaanā ki maiñ

jism-o-jāñ ke ta'alluq kī raushan guzargāh se

ik jahāñ kā safar jhel kar

is rifāqat kī dahlīz tak aa.ī huuñ

ai hasan kaash tū jaan saktā

ki is sahn-e-ḳhāna se dahlīz tak ke safar meñ

jahāñ-zād ko kyoñ zamāne lage haiñ

hasan

is safar meñ jahāñ-zād ko ek ik gaam par

vaqt ke tāziyāne lage haiñ

hasan

vaqt mālik bhī hai devtā bhī

muhāfiz bhī hai aur ḳhvāja-sarā bhī

ye dekhā hai maiñ ne

ki jab bhī darīchoñ meñ taaza shagūfa khilā hai

havā se vo hañs kar zarā sā gale bhī milā hai

to ḳhvāja-sarā kī nazar se kahāñ bach sakā hai

magar dekh mujh ko

ki maiñ ne yahāñ Thiik nau saal tak

phuul kāḌhe haiñ ḳhvāboñ ke bistar pe lekin

abhī tak koī in pe soyā nahīñ

phuul taaza shagufta aur āzurda haiñ

maiñ ne nau saal sūrat-garī kī hai tere har ik lams kī

raat bhar maiñ ne āñkheñ bhigoī haiñ kūzoñ meñ aur sub.h-dam

halq ko tar kiyā āñsuoñ se bahut

ye masāfat

ye nau saal kī be-mahābā masāfat

tire dar ke aage mujhe khīñch laa.ī

magar tū yahāñ chaak par apnī dhun meñ magan hai

nigāheñ uThā

dekh to maiñ jahāñ-zād terī tire sāmne huuñ

magar tū ne sach hī kahā thā

zamāna jahāñ-zād vo chaak hai

jis pe mīna-o-jām-o-subū aur fānūs-o-gul-dāñ kī mānind

bante bigaḌte haiñ insāñ

so ab ham jo sadiyoñ kī lambī masāfat se lauTe haiñ

tū apne ranjūr kūzoñ meñ jūjhā huā hai

ye terā qusūr aur na merī ḳhatā hai

koī kūza-gar to hamārā bhī hogā

so ye us kī hikmat

ki us ne hameñ chaak par Dhālte vaqt

lamhoñ kā pher is nazākat se rakkhā

ki ham apnī apnī jagah sirf shashdar khaḌe the

ka.ī dast-e-chābuk ke be-jān putle

mire aur tire darmiyāñ saj ga.e the

so ye us kī hikmat

magar vaqt is darja saffāk kyoñ hai

ye mashshāta-e-zindagī itnī chālāk kyoñ hai

mire aur tire darmiyāñ nau baras jis ne lā kar bichhā.e

ye nau saal kis tarh maiñ ne bitā.e

ki sāhil se kashtī tak aate hue

jaise taḳhte ke hamrāh dil Dagmagā.e

vahī nau baras

jo mire aur tire darmiyāñ vaqt kī kirchiyāñ haiñ

zamāna bhī kaisī 'ajab kahkashāñ hai

ye duniyā-e-sayyārgāñ hai ki jis meñ

hazāroñ kavākib

musalsal kisī chaak par ghūmte haiñ

ye ajsām ke gird ajsām kā raqs hī zindagī hai mirī jaañ

mirī jaan tū chaak ke saath miTTī ke rishte ko pahchāntā thā

hasan tū ne miTTī ke be-jān putloñ se

taḳhlīq ke jāñ-gusil marhaloñ meñ

sadā guftugū

sau tarah guftugū kī

zihānat ke putle mohabbat ke ḳhāliq

faqat ye batā de

ki tere 'anāsir ke ajzā-e-tarkībī meñ

vāhima kaise aayā

hasan tū vahāñ jhoñpaḌe meñ

akelā gale mil ke royā thā kis se

labīb aur tū aur maiñ

aur haqīqat meñ koī nahīñ thā

tirā vāhima

mere lab mere gesū se lipTā rahā thā

labīb ek saayā

jise tū ne rog apnī jaañ kā banāyā

ye saayā kahīñ gar haqīqat bhī hotā

to āḳhir ko tū is haqīqat se kyoñ be-ḳhabar thā

ki har jism ke saath ik āftāb aur mahtāb lāzim

ye taslīs qaa.em hai qaa.em rahegī

hasan maiñ tire sāmne aa.ina thī

tire hijr aur vasl kā aa.ina

inhimāk-o-ta'alluq kī miTTī se gūñdhe hue jism ko

terī āñkhoñ kī hiddat ne chamkāyā thā

terī ḳhalvat kī hairat ne vo rang-o-roġhan kiye the

ki ā.īne shashdar khaḌe rah ga.e the

magar terī ḳhalvat kī hairat meñ vahshat kā jo shā.iba thā

nigāhoñ se merī kahāñ chhup sakā thā

mire aur tire darmiyāñ vasl kī har ghaḌī meñ

na jaane kahāñ se

vahī soḳhta-baḳht terī

ki jo jāñ-fishānī ke sho'loñ se dahke hue

zindagī ke abad-tāb tannūr par

uñgliyāñ tere bachchoñ kī thāme khaḌī

bhuuk se barsar-e-jang thī

jis ke nazdīk ye

tere kuuze tirā fan tirī aag sab

merī āñkheñ mire phuul aur ḳhvāb sab

zindagī ke abad-tāb tannūr kī raakh the

terī is soḳhta-baḳht ko kyā ḳhabar

jab zamīñ apne mehvar kī tajdīd meñ

harf-e-lā se guzar jā.egī

to hazāroñ baras baa'd bhī

ye azal ke gharoñdoñ kī miTTī meñ madfūn

phuul aur buuTe ye kuuze

aur un meñ unhī qaaf āñkhoñ se chhalke hue

surḳh paanī kī talchhaT

kisī kūza-gar ke javāñ lams se jī uThe to

jahāñ-zād us ke liye phir janam legī

aur nau baras raqs karte guzar jā.eñge

terī is soḳhta-baḳht ko kyā ḳhabar

vo raat

vo halab kī kārvāñ-sarā kā hauz

jis ko maiñ ne jism-o-jāñ kī ḳhushbueñ kashīd kar ke

qatra-qatra nau baras meñ āñsuoñ se pur kiyā

vo ek raat sirf ek raat meñ

tamām ḳhushk ho gayā

ham apne vasl kī tamāzatoñ meñ aise jal-bujhe

ki raakh tak nahīñ bachī

ye ek jaañ kī tishnagī

mujhe tujhe ba-yak-zamāñ

bhalā kahāñ kahāñ na khīñchtī phirī

magar ye tū ne kyā kahā

ki tere jaisī 'aurateñ jahān-zād

aisī uljhaneñ haiñ jin ko aaj tak koī nahīñ suljhā sakā

ki 'auratoñ kī sāḳht hai vo tanz apne aap par

javāb jin kā ham nahīñ

to phir ye jām-o-mīnā-o-subū-o-hauz-o-rūd-e-nīl

is zamīñ kī god meñ

azal ke harf-gīr tābnāk ḳhvāb ke liye

kahīñ bhī kuchh raqam nahīñ

ai hasan

chaak par se zarā apnī nazreñ haTā

tū mire nau baras tak banā.e ga.e phuul to dekh le

phuul taaza shagufta aur āzurda haiñ

yuuñ na ho ki inheñ

bhuuk aur muflisī ke satā.e hue

mere bachche bhī nīlām kar aa.eñ jā kar kahīñ

tere kūzoñ ke mānind baġhdād meñ

ai hasan

dāman-e-vaqt par jitne phuul aur buuTe saje haiñ

jahāñ-zād kī zaḳhmī poroñ ne

rang un meñ apne junūñ ke bhare haiñ

ye tāvān haiñ champa.ī uñgliyoñ kā

tire jām-o-mīnā pe

jis ḳhāl-o-ḳhad kī nazākat kī parchhā.īyāñ thiiñ

tujhe kyā ḳhabar ye kin āñkhoñ kī bīnā.iyāñ thiiñ

hasan ye mohabbat

ki jis ko tirī soḳhta-baḳht gardāntī hai

amīroñ kī baazī

to mere ta.iiñ ye amīroñ kī baazī kahāñ

sirf bāzīgarī thī

mohabbat hamesha se muflis kā sarmāya-e-jāñ rahī hai

yahī to vo pūñjī hai

jis tak amīroñ ke haath ab bhī pahuñche nahīñ haiñ

tujhe ye gumāñ thā

ki 'aurat mohabbat kī baazī meñ be-jān patte kī sūrat

kisī dast-e-chābuk kī marhūn-e-minnat

vo is khel meñ ek mohre kī sūrat

ki jab jis ne chāhā

ise ek ghar se uThā kar

kisī dūsre ghar kā mālik banāyā

ki 'aurat faqat ek patthar kī mūrat

ye tasvīr-e-hairat

yūñhī chup khaḌī hai

yūñhī chup rahegī

magar yuuñ nahīñ hai

hasan tū ne dekhā

ki maiñ qaid-e-auhām o band-e-rivāyāt meñ

būḌhe 'attār yūsuf kī dukkān par

apnī āñkheñ tujhe nazr kartī rahī

būḌhā 'attār vo kīmiyā-gar

ki jis ne zamānoñ ke jangal se

chehroñ ke phuul aur buuTe chune

vo mujhe aur tujhe jāntā thā magar

maiñ ne bāzār meñ

tujh se āñkhoñ kā aur dil kā saudā kiyā

ai hasan

mere ek ik darīche pe

kohna rivāyāt o zālim 'aqā.ed kā jangal ugā thā

hasan

kaash tū merī āñkhoñ se mere darīche ko taktā

to ye jaan saktā

jahāñ tū khaḌā thā vahāñ ek ik darz se

merī āñkheñ mirā jism

chhan chhan ke

kaT kaT ke girtā rahā thā

ai hasan-kuza-gar

tu ne jaana ki main

jism-o-jaan ke ta'alluq ki raushan guzargah se

ek jahan ka safar jhel kar

is rifaqat ki dahliz tak aai hun

ai hasan kash tu jaan sakta

ki is sahn-e-KHana se dahliz tak ke safar mein

jahan-zad ko kyon zamane lage hain

hasan

is safar mein jahan-zad ko ek ek gam par

waqt ke taziyane lage hain

hasan

waqt malik bhi hai dewta bhi

muhafiz bhi hai aur KHwaja-sara bhi

ye dekha hai main ne

ki jab bhi darichon mein taza shagufa khila hai

hawa se wo hans kar zara sa gale bhi mila hai

to KHwaja-sara ki nazar se kahan bach saka hai

magar dekh mujh ko

ki main ne yahan Thik nau sal tak

phul kaDhe hain KHwabon ke bistar pe lekin

abhi tak koi in pe soya nahin

phul taza shagufta aur aazurda hain

main ne nau sal surat-gari ki hai tere har ek lams ki

raat bhar main ne aankhen bhigoi hain kuzon mein aur subh-dam

halq ko tar kiya aansuon se bahut

ye masafat

ye nau sal ki be-mahaba masafat

tere dar ke aage mujhe khinch lai

magar tu yahan chaak par apni dhun mein magan hai

nigahen uTha

dekh to main jahan-zad teri tere samne hun

magar tu ne sach hi kaha tha

zamana jahan-zad wo chaak hai

jis pe mina-o-jam-o-subu aur fanus-o-gul-dan ki manind

bante bigaDte hain insan

so ab hum jo sadiyon ki lambi masafat se lauTe hain

tu apne ranjur kuzon mein jujha hua hai

ye tera qusur aur na meri KHata hai

koi kuza-gar to hamara bhi hoga

so ye us ki hikmat

ki us ne hamein chaak par Dhaalte waqt

lamhon ka pher is nazakat se rakkha

ki hum apni apni jagah sirf shashdar khaDe the

kai dast-e-chabuk ke be-jaan putle

mere aur tere darmiyan saj gae the

so ye us ki hikmat

magar waqt is darja saffak kyon hai

ye mashshata-e-zindagi itni chaalak kyon hai

mere aur tere darmiyan nau baras jis ne la kar bichhae

ye nau sal kis tarh main ne bitae

ki sahil se kashti tak aate hue

jaise taKHte ke hamrah dil Dagmagae

wahi nau baras

jo mere aur tere darmiyan waqt ki kirchiyan hain

zamana bhi kaisi 'ajab kahkashan hai

ye duniya-e-sayyargan hai ki jis mein

hazaron kawakib

musalsal kisi chaak par ghumte hain

ye ajsam ke gird ajsam ka raqs hi zindagi hai meri jaan

meri jaan tu chaak ke sath miTTi ke rishte ko pahchanta tha

hasan tu ne miTTi ke be-jaan putlon se

taKHliq ke jaan-gusil marhalon mein

sada guftugu

sau tarah guftugu ki

zihanat ke putle mohabbat ke KHaliq

faqat ye bata de

ki tere 'anasir ke ajza-e-tarkibi mein

wahima kaise aaya

hasan tu wahan jhonpaDe mein

akela gale mil ke roya tha kis se

labib aur tu aur main

aur haqiqat mein koi nahin tha

tera wahima

mere lab mere gesu se lipTa raha tha

labib ek saya

jise tu ne rog apni jaan ka banaya

ye saya kahin gar haqiqat bhi hota

to aaKHir ko tu is haqiqat se kyon be-KHabar tha

ki har jism ke sath ek aaftab aur mahtab lazim

ye taslis qaem hai qaem rahegi

hasan main tere samne aaina thi

tere hijr aur wasl ka aaina

inhimak-o-ta'alluq ki miTTi se gundhe hue jism ko

teri aankhon ki hiddat ne chamkaya tha

teri KHalwat ki hairat ne wo rang-o-roghan kiye the

ki aaine shashdar khaDe rah gae the

magar teri KHalwat ki hairat mein wahshat ka jo shaiba tha

nigahon se meri kahan chhup saka tha

mere aur tere darmiyan wasl ki har ghaDi mein

na jaane kahan se

wahi soKHta-baKHt teri

ki jo jaan-fishani ke sho'lon se dahke hue

zindagi ke abad-tab tannur par

ungliyan tere bachchon ki thame khaDi

bhuk se barsar-e-jang thi

jis ke nazdik ye

tere kuze tera fan teri aag sab

meri aankhen mere phul aur KHwab sab

zindagi ke abad-tab tannur ki rakh the

teri is soKHta-baKHt ko kya KHabar

jab zamin apne mehwar ki tajdid mein

harf-e-la se guzar jaegi

to hazaron baras ba'd bhi

ye azal ke gharondon ki miTTi mein madfun

phul aur buTe ye kuze

aur un mein unhi qaf aankhon se chhalke hue

surKH pani ki talchhaT

kisi kuza-gar ke jawan lams se ji uThe to

jahan-zad us ke liye phir janam legi

aur nau baras raqs karte guzar jaenge

teri is soKHta-baKHt ko kya KHabar

wo raat

wo halab ki karwan-sara ka hauz

jis ko main ne jism-o-jaan ki KHushbuen kashid kar ke

qatra-qatra nau baras mein aansuon se pur kiya

wo ek raat sirf ek raat mein

tamam KHushk ho gaya

hum apne wasl ki tamazaton mein aise jal-bujhe

ki rakh tak nahin bachi

ye ek jaan ki tishnagi

mujhe tujhe ba-yak-zaman

bhala kahan kahan na khinchti phiri

magar ye tu ne kya kaha

ki tere jaisi 'auraten jahan-zad

aisi uljhanen hain jin ko aaj tak koi nahin suljha saka

ki 'auraton ki saKHt hai wo tanz apne aap par

jawab jin ka hum nahin

to phir ye jam-o-mina-o-subu-o-hauz-o-rud-e-nil

is zamin ki god mein

azal ke harf-gir tabnak KHwab ke liye

kahin bhi kuchh raqam nahin

ai hasan

chaak par se zara apni nazren haTa

tu mere nau baras tak banae gae phul to dekh le

phul taza shagufta aur aazurda hain

yun na ho ki inhen

bhuk aur muflisi ke satae hue

mere bachche bhi nilam kar aaen ja kar kahin

tere kuzon ke manind baghdad mein

ai hasan

daman-e-waqt par jitne phul aur buTe saje hain

jahan-zad ki zaKHmi poron ne

rang un mein apne junun ke bhare hain

ye tawan hain champai ungliyon ka

tere jam-o-mina pe

jis KHal-o-KHad ki nazakat ki parchhaiyan thin

tujhe kya KHabar ye kin aankhon ki binaiyan thin

hasan ye mohabbat

ki jis ko teri soKHta-baKHt gardanti hai

amiron ki bazi

to mere tain ye amiron ki bazi kahan

sirf bazigari thi

mohabbat hamesha se muflis ka sarmaya-e-jaan rahi hai

yahi to wo punji hai

jis tak amiron ke hath ab bhi pahunche nahin hain

tujhe ye guman tha

ki 'aurat mohabbat ki bazi mein be-jaan patte ki surat

kisi dast-e-chabuk ki marhun-e-minnat

wo is khel mein ek mohre ki surat

ki jab jis ne chaha

ise ek ghar se uTha kar

kisi dusre ghar ka malik banaya

ki 'aurat faqat ek patthar ki murat

ye taswir-e-hairat

yunhi chup khaDi hai

yunhi chup rahegi

magar yun nahin hai

hasan tu ne dekha

ki main qaid-e-auham o band-e-riwayat mein

buDhe 'attar yusuf ki dukkan par

apni aankhen tujhe nazr karti rahi

buDha 'attar wo kimiya-gar

ki jis ne zamanon ke jangal se

chehron ke phul aur buTe chune

wo mujhe aur tujhe jaanta tha magar

main ne bazar mein

tujh se aankhon ka aur dil ka sauda kiya

ai hasan

mere ek ek dariche pe

kohna riwayat o zalim 'aqaed ka jangal uga tha

hasan

kash tu meri aankhon se mere dariche ko takta

to ye jaan sakta

jahan tu khaDa tha wahan ek ek darz se

meri aankhen mera jism

chhan chhan ke

kaT kaT ke girta raha tha