jahan-zadi ka status

zamāna kitnā badal gayā hai

maqām rishtoñ kā miT rahā hai

kahīñ mohabbat kā ruup dhāre

kahīñ sulagte ye nafratoñ se

kahīñ pe āñkhoñ meñ ret ban kar

chubhan kī sūrat rulā rahe haiñ

kahīñ ye barqī payām ban kar

hazār mīloñ pe chhā.ī duurī ke bādaloñ ko haTā rahe haiñ

diloñ kī dhaḌkan baḌhā rahe haiñ

rivāyatoñ ko badal rahe haiñ

vafā ke dhāge jafā se har dam ulajh rahe haiñ

udaas lamhe ḳhushī-o-hairat kī saarī ghaḌiyāñ

diloñ se bāhar nikal ke dīvār kā navishta

mohabbat azalī aziim rishta

jo lākhoñ pardoñ meñ jagmagātā thā

ab status pe ishtihā kī ḳhabar kī sūrat badal rahā hai

koī bhī jazba koī bhī rishta

na mustaqil hai na mo'atabar hai

palak jhapakne meñ badle manzar

ki jaise koī jahān-zādī ta.alluq apnā badal rahī ho

na.ī koī chaal chal rahī ho

junūñ kī aglī jo manzileñ haiñ

vahāñ pe tasvīreñ āvezāñ haiñ

dabī dabī muskurāhaTeñ haiñ

ghuTī ghuTī sansanāhaTeñ haiñ

junūn ehsās aur mohabbat

vaqār apnā miTā rahī haiñ

batā rahī haiñ

zamāna kitnā badal gayā hai

zamana kitna badal gaya hai

maqam rishton ka miT raha hai

kahin mohabbat ka rup dhaare

kahin sulagte ye nafraton se

kahin pe aankhon mein ret ban kar

chubhan ki surat rula rahe hain

kahin ye barqi payam ban kar

hazar milon pe chhai duri ke baadalon ko haTa rahe hain

dilon ki dhaDkan baDha rahe hain

riwayaton ko badal rahe hain

wafa ke dhage jafa se har dam ulajh rahe hain

udas lamhe KHushi-o-hairat ki sari ghaDiyan

dilon se bahar nikal ke diwar ka nawishta

mohabbat azali azim rishta

jo lakhon pardon mein jagmagata tha

ab status pe ishtiha ki KHabar ki surat badal raha hai

koi bhi jazba koi bhi rishta

na mustaqil hai na mo'atabar hai

palak jhapakne mein badle manzar

ki jaise koi jahan-zadi talluq apna badal rahi ho

nai koi chaal chal rahi ho

junun ki agli jo manzilen hain

wahan pe taswiren aawezan hain

dabi dabi muskurahaTen hain

ghuTi ghuTi sansanahaTen hain

junun ehsas aur mohabbat

waqar apna miTa rahi hain

bata rahi hain

zamana kitna badal gaya hai