jahl

kise kyā kahūñ

mire lafz tarsīl se munharif haiñ

mirī soch apnī hī pechāk pe ghūmtī jā rahī hai

sunahre rupahle hare kāsnī

kuuza dar kuuza

rañgoñ meñ lipTe hue

mere jazbāt

jin ko parosūñ to sochūñ

bahut talḳh hai zā.iqa

kaun samjhe mohabbat kī jādūgarī

kaun parkhe adāvat kī pākīzgī

kis ko samjhā.ūñ hijrat kī āvārgī

kis ko dikhlā.ūñ ġhurbat kī āsūdgī

dil meñ rakh luuñ to zahrāb ban jā.eñge

ḳhush-kalāmī kā kaise bharam rakh sakūñ

āfrīnī kahīñ hai to ma.anī kahīñ

aisā bikhrāo pahle nahīñ thā kabhī

sach ko ġhāze-o-ġhamze se kyā aar thā

ab mulamma.a kī koshish meñ dil hai kahīñ

zehn hai aur kahīñ

lafz tārīk-tar

soch bhī gunjlak

ḳhud pe apnā yaqīñ laḌkhaḌā sā gayā

bāzgasht-e-sadā merā pīchhā na kar

mujh ko mere tayaqqun ne jāhil kiyā

kise kya kahun

mere lafz tarsil se munharif hain

meri soch apni hi pechaak pe ghumti ja rahi hai

sunahre rupahle hare kasni

kuza dar kuza

rangon mein lipTe hue

mere jazbaat

jin ko parosun to sochun

bahut talKH hai zaiqa

kaun samjhe mohabbat ki jadugari

kaun parkhe adawat ki pakizgi

kis ko samjhaun hijrat ki aawargi

kis ko dikhlaun ghurbat ki aasudgi

dil mein rakh lun to zahrab ban jaenge

KHush-kalami ka kaise bharam rakh sakun

aafrini kahin hai to mani kahin

aisa bikhrao pahle nahin tha kabhi

sach ko ghaze-o-ghamze se kya aar tha

ab mulamma ki koshish mein dil hai kahin

zehn hai aur kahin

lafz tarik-tar

soch bhi gunjlak

KHud pe apna yaqin laDkhaDa sa gaya

bazgasht-e-sada mera pichha na kar

mujh ko mere tayaqqun ne jahil kiya