jalal-e-husn

kal dikhī thī vo mujh ko

ġhāziyoñ ke majma' meñ

bāġhiyoñ ke halqe meñ

haq ke pairokāroñ meñ

inqilābī nā'roñ meñ

lashkar-e-shujā'at meñ

kārvān-e-himmat meñ

us kī jis kalā.ī meñ

mere naam kā kangan

karvaTeñ badaltā thā

aaj us kalā.ī par

ik safed paTTī thī

jis pe ḳhuun ke chhīñTe

ġhāliban batāte the

goyā us ne kal shab hī

chūḌiyoñ ko toḌā ho

us kī chauḌī peshānī

jis pe zaḳhm kā gahrā

ik nishān ubhrā thā

zulm aur sitam kī jo

dāstāñ sunātā thā

us kī surma.ī āñkheñ

bārhā jinheñ maiñ ne

jhiil se milāyā thā

un meñ ḳhuuñ ubaltā thā

ġhaiz aur ġhazab meñ vo

intiqām ke sho'le

barhamī ke angāre

ātishī dahakte the

us ke pankhuḌī se lab

azhdahe kī sūrat meñ

zulm ke sapoloñ ko

ġharq karne vaale the

us kī vo siyah zulfeñ

zulm ke makānoñ meñ

raat laane vaalī thiiñ

vo nishān-e-haq thāme

kārvān-e-haq le kar

jo qadam baḌhātī thī

us ke naqsh-e-pā yaaro

ret par sunahrī sī

kahkashāñ banāte the

maiñ zarā rukā Thahrā

do qadam chalā aur phir

us ke naqsh-e-pā chūme

chuum kar chalā aayā

kal dikhi thi wo mujh ko

ghaziyon ke majma' mein

baghiyon ke halqe mein

haq ke pairokaron mein

inqilabi na'ron mein

lashkar-e-shuja'at mein

karwan-e-himmat mein

us ki jis kalai mein

mere nam ka kangan

karwaTen badalta tha

aaj us kalai par

ek safed paTTi thi

jis pe KHun ke chhinTe

ghaaliban batate the

goya us ne kal shab hi

chuDiyon ko toDa ho

us ki chauDi peshani

jis pe zaKHm ka gahra

ek nishan ubhra tha

zulm aur sitam ki jo

dastan sunata tha

us ki surmai aankhen

barha jinhen main ne

jhil se milaya tha

un mein KHun ubalta tha

ghaiz aur ghazab mein wo

intiqam ke sho'le

barhami ke angare

aatishi dahakte the

us ke pankhuDi se lab

azhdahe ki surat mein

zulm ke sapolon ko

gharq karne wale the

us ki wo siyah zulfen

zulm ke makanon mein

raat lane wali thin

wo nishan-e-haq thame

karwan-e-haq le kar

jo qadam baDhati thi

us ke naqsh-e-pa yaro

ret par sunahri si

kahkashan banate the

main zara ruka Thahra

do qadam chala aur phir

us ke naqsh-e-pa chume

chum kar chala aaya