jaliyan-wala bagh

ai ki tū gahvāra-e-shān-e-vatan

sajda-gāh-e-ahl-e-īmān-e-vatan

markaz-e-arbāb-e-armān-e-vatan

azmat-e-ḳhūn-e-shahīdān-e-vatan

jang-e-āzādī kī zinda yādgār

āstāñ par tere sajde laakh baar

yaad hai vo din hameñ ai jān-e-man

jab adū tujh par huā thā teġh-zan

aur sad.hā jāñ-nisārān-e-vatan

tujh pe qurbāñ ho ga.e dar dam zadan

yaad hai un ke lahū kī ye pukār

āstāñ par tere sajde laakh baar

yaad hai vo manzar-e-sehn-e-chaman

ziist par barq-e-ajal partav-fagan

vaqf naala har fidā-e-anjuman

kushtoñ ke pushte the miTTī kā kafan

ḳhūn-e-abnā-e-vatan ke lāla-zār

āstāñ par tere sajde laakh baar

aaj hai vo inqalāb-e-anjuman

tū hai unvān-e-bahār-e-anjuman

aur jis jā nasb the dār-o-rasan

ab vahāñ shādāb haiñ sarv-o-saman

qaum kī ummīd ai bāġh-o-bahār

āstāñ par tere sajde laakh baar

tere chhalnī dil ke zaḳhmoñ kī jalan

misl-e-sham.a-e-hurriyat hai zau-fagan

aur vo terī jabīñ kī har shikan

sub.h-e-āzādī kī hai zarrīñ kiran

tujh se sharminda hai shāhī kā vaqār

āstāñ par tere sajde laakh baar

mazlūm kī āvāz hai jaliyāñ-vālā

ik soz bharā saaz hai jaliyāñ-vālā

raqsāñ hai jahāñ jashn-e-shahādat 'hindī'

vo jalva-gah-e-nāz hai jaliyāñ-vālā

ai ki tu gahwara-e-shan-e-watan

sajda-gah-e-ahl-e-iman-e-watan

markaz-e-arbab-e-arman-e-watan

azmat-e-KHun-e-shahidan-e-watan

jang-e-azadi ki zinda yaadgar

aastan par tere sajde lakh bar

yaad hai wo din hamein ai jaan-e-man

jab adu tujh par hua tha tegh-zan

aur sadha jaan-nisaran-e-watan

tujh pe qurban ho gae dar dam zadan

yaad hai un ke lahu ki ye pukar

aastan par tere sajde lakh bar

yaad hai wo manzar-e-sehn-e-chaman

zist par barq-e-ajal partaw-fagan

waqf nala har fida-e-anjuman

kushton ke pushte the miTTi ka kafan

KHun-e-abna-e-watan ke lala-zar

aastan par tere sajde lakh bar

aaj hai wo inqalab-e-anjuman

tu hai unwan-e-bahaar-e-anjuman

aur jis ja nasb the dar-o-rasan

ab wahan shadab hain sarw-o-saman

qaum ki ummid ai bagh-o-bahaar

aastan par tere sajde lakh bar

tere chhalni dil ke zaKHmon ki jalan

misl-e-shama-e-hurriyat hai zau-fagan

aur wo teri jabin ki har shikan

subh-e-azadi ki hai zarrin kiran

tujh se sharminda hai shahi ka waqar

aastan par tere sajde lakh bar

mazlum ki aawaz hai jaliyan-wala

ek soz bhara saz hai jaliyan-wala

raqsan hai jahan jashn-e-shahadat 'hindi'

wo jalwa-gah-e-naz hai jaliyan-wala