jalwa-e-sahar

tamām aurāq shabnamistān-e-sahar kī kirnoñ se jagmagā.e

tulūa hotī hai sub.h jaise kalī tamannā kī muskurā.e

kahīñ daraḳhtoñ meñ ġhol chiḌiyā kā baiTh kar chahchahā rahā hai

kahīñ se totoñ kā jhunD uTThā fazā-e-gulshan meñ ġhul machā.e

saḌak jo aatī hai chhāvnī se chahal-pahal us pe ḳhuub hī hai

nikal ke gunjān bastiyoñ se barā-e-tafrīh sab haiñ aa.e

usī pe aatā hai ek motor bhī Dāk-ḳhāne kī Daak lene

usī pe jaate haiñ kuchh dehātī ladī huī gāḌiyāñ hakā.e

Tahalne jaatī haiñ laḌkiyāñ kuchh hasīn phūloñ kī kyāriyoñ meñ

nigāh-jādū shabāb-jādū jo aañkh Daale vo luT hī jaa.e

idhar se gañgā ko jā rahe haiñ kuchh aadmī chhāgaleñ sambhāle

udhar se gañgā se aa rahī hai kuchh aurteñ nuur meñ nahā.e

udhar se collage kī ek laḌkī bhī apne collage ko jā rahī hai

kitāb daabe qadam baḌhā.e shabāb thāme nazar jhukā.e

udhar se ek naujavān lady na.e ḳhayāloñ kī aa rahī hai

nigāh-e-raqsāñ shabāb uryāñ jo is ko dekhe vo muskurā.e

udhar se shā.ir 'nushūr'-e-hairāñ bhī apnī sairoñ meñ jā rahā hai

qadam taḳhayyul meñ Dagmagā.e na.e shabāboñ se choT khaa.e

tamam auraq shabnamistan-e-sahar ki kirnon se jagmagae

tulua hoti hai subh jaise kali tamanna ki muskurae

kahin daraKHton mein ghol chiDiya ka baiTh kar chahchaha raha hai

kahin se toton ka jhunD uTTha faza-e-gulshan mein ghul machae

saDak jo aati hai chhawni se chahal-pahal us pe KHub hi hai

nikal ke gunjaan bastiyon se bara-e-tafrih sab hain aae

usi pe aata hai ek motor bhi Dak-KHane ki Dak lene

usi pe jate hain kuchh dehati ladi hui gaDiyan hakae

Tahalne jati hain laDkiyan kuchh hasin phulon ki kyariyon mein

nigah-jadu shabab-jadu jo aankh Dale wo luT hi jae

idhar se ganga ko ja rahe hain kuchh aadmi chhagalen sambhaale

udhar se ganga se aa rahi hai kuchh aurten nur mein nahae

udhar se collage ki ek laDki bhi apne collage ko ja rahi hai

kitab dabe qadam baDhae shabab thame nazar jhukae

udhar se ek naujawan lady nae KHayalon ki aa rahi hai

nigah-e-raqsan shabab uryan jo is ko dekhe wo muskurae

udhar se shair 'nushur'-e-hairan bhi apni sairon mein ja raha hai

qadam taKHayyul mein Dagmagae nae shababon se choT khae