jamuna-ji

naaz kyuuñ ho na tujhe kirshn dulārī jamunā

tū to rādhā kī sahelī banī pyārī jamunā

rutba aalī hai tirā martaba bhārī jamunā

har jagah faiz-e-atam rahtā hai jaarī jamunā

hai yaqīñ garm kisī din bharī mahfil hogī

rās-manDal kī vo liilā lab-e-sāhil hogī

miT gayā lutf tirā chhin gayā gahnā terā

jab kanhayyā nahīñ be-lutf hai rahnā terā

ġham uThānā sitam-o-jaur ko sahnā terā

paanī ho ho ke shab-o-roz ye bahnā terā

ātish-e-hijr kuchh is darja lagī hai tan meñ

dil na mathurā meñ bahaltā hai na bindrāban meñ

baat bigḌī nahīñ ab bhī hai vahī baat tirī

vahī jaaḌā vahī garmī vahī barsāt tirī

din usī Dhañg usī rañg kī hai raat tirī

kaun kah saktā hai kuchh bhī nahīñ auqāt tirī

kirshn sadqe haiñ to rādhā haiñ fidā.ī jamunā

har taraf ḳhalq meñ hai terī dahā.ī jamunā

saadī saadī hai ravish vaz.a hai bholī-bhālī

hai ravānī bhī ġhazab chaal bhī hai matvālī

niilī maujoñ se pashemāñ huiiñ zulfeñ kaalī

husn-o-ārā.ish-o-zīnat se baḌhī ḳhush-hālī

allāh-allāh re is nāz-o-adā kī hastī

tere aage nahīñ kuchh āb-e-baqā kī hastī

pūchhe rādhā se koī qadr-e-haqīqat terī

kirshn se jāñche koī ḳhūbī-e-izzat terī

saarī duniyā meñ hai phailī huī azmat terī

us ko jannat milī kī jis ne bhī ḳhidmat terī

apnā ham-rutba jo paayā tujhe gañgā-jī ne

apne pahlū meñ biThāyā tujhe gañgā-jī ne

baa.is naaz hai be-shubah himāla ke liye

sabab-e-faḳhr-o-sharf gokul-o-mathurā ke liye

ḳhaas ik nemat-e-haq vādī-o-sahrā ke liye

muḳhtasar ye hai baḌī chiiz hai duniyā ke liye

dil kī sar-basta kalī fart-e-ḳhushī se khul jaa.e

us ko amrit mile jis ko tirā paanī mil jaa.e

sach hai asrār-e-haqīqat kā ḳhazāna tū hai

hāl-o-mustaqbil-o-māzī kā zamāna tū hai

lutf-āgīñ tarab-āmez fasāna tū hai

sab haiñ begāne agar hai to yagāna tū hai

saaf ā.īne kī sūrat hai safā.ī terī

bandagī kyuuñ na kare saarī ḳhudā.ī terī

nigah-e-fazl-o-tarahhum se ishārā kar de

jo na ho kaam kisī se vo ḳhudārā kar de

ranj-o-ġham dard-o-qalaq duur hamārā kar de

pyārī maḳhlūq meñ kuchh aur bhī pyārā kar de

rahnumā.ī tirī 'bismil' ke liye sab kuchh hai

nā-ḳhudā.ī tirī 'bismil' ke liye sab kuchh hai

naz kyun ho na tujhe kirshn dulari jamuna

tu to radha ki saheli bani pyari jamuna

rutba aali hai tera martaba bhaari jamuna

har jagah faiz-e-atam rahta hai jari jamuna

hai yaqin garm kisi din bhari mahfil hogi

ras-manDal ki wo lila lab-e-sahil hogi

miT gaya lutf tera chhin gaya gahna tera

jab kanhayya nahin be-lutf hai rahna tera

gham uThana sitam-o-jaur ko sahna tera

pani ho ho ke shab-o-roz ye bahna tera

aatish-e-hijr kuchh is darja lagi hai tan mein

dil na mathura mein bahalta hai na bindraban mein

baat bigDi nahin ab bhi hai wahi baat teri

wahi jaDa wahi garmi wahi barsat teri

din usi Dhang usi rang ki hai raat teri

kaun kah sakta hai kuchh bhi nahin auqat teri

kirshn sadqe hain to radha hain fidai jamuna

har taraf KHalq mein hai teri dahai jamuna

sadi sadi hai rawish waza hai bholi-bhaali

hai rawani bhi ghazab chaal bhi hai matwali

nili maujon se pasheman huin zulfen kali

husn-o-araish-o-zinat se baDhi KHush-haali

allah-allah re is naz-o-ada ki hasti

tere aage nahin kuchh aab-e-baqa ki hasti

puchhe radha se koi qadr-e-haqiqat teri

kirshn se jaanche koi KHubi-e-izzat teri

sari duniya mein hai phaili hui azmat teri

us ko jannat mili ki jis ne bhi KHidmat teri

apna ham-rutba jo paya tujhe ganga-ji ne

apne pahlu mein biThaya tujhe ganga-ji ne

bais naz hai be-shubah himala ke liye

sabab-e-faKHr-o-sharf gokul-o-mathura ke liye

KHas ek nemat-e-haq wadi-o-sahra ke liye

muKHtasar ye hai baDi chiz hai duniya ke liye

dil ki sar-basta kali fart-e-KHushi se khul jae

us ko amrit mile jis ko tera pani mil jae

sach hai asrar-e-haqiqat ka KHazana tu hai

haal-o-mustaqbil-o-mazi ka zamana tu hai

lutf-agin tarab-amez fasana tu hai

sab hain begane agar hai to yagana tu hai

saf aaine ki surat hai safai teri

bandagi kyun na kare sari KHudai teri

nigah-e-fazl-o-tarahhum se ishaara kar de

jo na ho kaam kisi se wo KHudara kar de

ranj-o-gham dard-o-qalaq dur hamara kar de

pyari maKHluq mein kuchh aur bhi pyara kar de

rahnumai teri 'bismil' ke liye sab kuchh hai

na-KHudai teri 'bismil' ke liye sab kuchh hai