janam jali

mere baap ne pasandīda aurat girā.ī

aur us ke peT meñ gaalī thuuk dī

razīla kī chhātī se

maiñ ne saañs kī chhāl udheḌī

chamḌe ke bistar se jism ko alāhada kiyā

ruuh kā nañg Dhāñpne ke liye

baan kī chhāgal meñ a.azā kā ta.affun bū diyā

mard kī ragaḌ se hāñpne ke liye

zard putlī se ḳhvāb kā lothḌā phislā

halq meñ aTkā aur maiñ nadāmat ho ga.ī

kasīlī namī ke rañg se

zabān kī kirchī ko āshnā kiyā

mere nathune faqat bheḌoñ kī boss chakh sakte haiñ

hoñT ke kone meñ gandhak ne tā.ūn kā TukḌā rakhā

ḳhauf kī gāñTh se maiñ ne siine ko daaġh diyā

hāmila hone se qabl maiñ ne peT par jhurriyāñ khodīñ

khajūr ke tane se pyaar kiyā

aur apnī piiTh kā lams diyā

ḳhudā kī aañkh ne aañsū chabā liyā

so maiñ bāñjh nahīñ rah sakī

merī kokh meñ tīsrī dāḌhī hai

aur murda hai

mere bap ne pasandida aurat girai

aur us ke peT mein gali thuk di

razila ki chhati se

main ne sans ki chhaal udheDi

chamDe ke bistar se jism ko alahada kiya

ruh ka nang Dhanpne ke liye

ban ki chhagal mein aaza ka taffun bu diya

mard ki ragaD se hanpne ke liye

zard putli se KHwab ka lothDa phisla

halq mein aTka aur main nadamat ho gai

kasili nami ke rang se

zaban ki kirchi ko aashna kiya

mere nathune faqat bheDon ki boss chakh sakte hain

honT ke kone mein gandhak ne taun ka TukDa rakha

KHauf ki ganTh se main ne sine ko dagh diya

hamila hone se qabl main ne peT par jhurriyan khodin

khajur ke tane se pyar kiya

aur apni piTh ka lams diya

KHuda ki aankh ne aansu chaba liya

so main banjh nahin rah saki

meri kokh mein tisri daDhi hai

aur murda hai