jang se hoga kuchh nahin hasil

ḳhudā ke vāste nafrat kā khel ḳhatm karo

ye dushmanī ye adāvat kā khel band karo

ki hogī jang se donoñ taraf hī barbādī

mareñge log yaqīnan miTegī ābādī

lahū bahegā jaleñge makān logo ke

tabāh hoñge bas is se jahān logo ke

zamīñ phaTegī to phir āsmān TūTegā

ye saarī duniyā kā māhaul chīkh uTThegā

lagegā daaġh phir insāniyat ke dāman par

gireñge bam ke ye gole kisī ke āñgan par

ye jang vaqt kī tahzīb ko kuchal degī

ye jang amn ke phūloñ ko bhī masal degī

kī is se amn kī tahzīb kī tabāhī hai

ye kaisā zulm hai ye kis kī bad-nigāhī hai

na hogā jang se tum ko kabhī bhī kuchh hāsil

panap na pā.egā sadiyoñ talak ye mustaqbil

ye jang kuchh nahīñ degī tabāhiyoñ ke sivā

natīja kuchh bhī na hogā burā.iyoñ ke sivā

KHuda ke waste nafrat ka khel KHatm karo

ye dushmani ye adawat ka khel band karo

ki hogi jang se donon taraf hi barbaadi

marenge log yaqinan miTegi aabaadi

lahu bahega jalenge makan logo ke

tabah honge bas is se jahan logo ke

zamin phaTegi to phir aasman TuTega

ye sari duniya ka mahaul chikh uTThega

lagega dagh phir insaniyat ke daman par

girenge bam ke ye gole kisi ke aangan par

ye jang waqt ki tahzib ko kuchal degi

ye jang amn ke phulon ko bhi masal degi

ki is se amn ki tahzib ki tabahi hai

ye kaisa zulm hai ye kis ki bad-nigahi hai

na hoga jang se tum ko kabhi bhi kuchh hasil

panap na paega sadiyon talak ye mustaqbil

ye jang kuchh nahin degi tabahiyon ke siwa

natija kuchh bhi na hoga buraiyon ke siwa