janm din

maiñ aur merī hayāt

yuuñ to donoñ saath saath chalte haiñ

phir bhī ham-kalām nahīñ hote

jaise ek dūsre se nā-āshnā

yā phir donoñ kī zabāneñ judā judā

hālāt kī kashtī meñ Dolte jaate haiñ

anjām se be-ḳhabar ḳhatrāt se be-ḳhatar

aabla jis ke phūTne kā intizār

ek ḳhaar ek kalī kā muhtāj

saal ke bārah mahīne hafte ke saat din

sub.h shaam un meñ phañsā huā maiñ

yahī ibtidā yahī intihā

bas saañs kā bhatta chaltā hai

din lohe kī mānind pighaltā hai

aur maiñ bhī

laavā ban kar ek din

in saal ke bārah mahīnoñ

hafte ke saath dinoñ meñ kabhī

bah jā.ūñgā

main aur meri hayat

yun to donon sath sath chalte hain

phir bhi ham-kalam nahin hote

jaise ek dusre se na-ashna

ya phir donon ki zabanen juda juda

haalat ki kashti mein Dolte jate hain

anjam se be-KHabar KHatraat se be-KHatar

aabla jis ke phuTne ka intizar

ek KHar ek kali ka muhtaj

sal ke barah mahine hafte ke sat din

subh sham un mein phansa hua main

yahi ibtida yahi intiha

bas sans ka bhatta chalta hai

din lohe ki manind pighalta hai

aur main bhi

lawa ban kar ek din

in sal ke barah mahinon

hafte ke sath dinon mein kabhi

bah jaunga