janm din

raat kā shāyad ek bajā hai

paañv thake haiñ sar bhārī hai

āñkheñ ek an-dekhe ḳhudā se

niiñd kī bhikshā maañg ke behad sharminda haiñ

pichhle paiñtālīs kaḌe kosoñ meñ kyā kyā moḌ aa.e haiñ

har chaurāhā

kyā kyā vahm-o-gumāñ laayā hai

kyā āvāzeñ

kānoñ ke pardoñ ko aksar chhed ga.ī haiñ

kyā kyā manzar

dhund bharī āñkhoñ ne dekhe

kaisī zarbeñ zehn ne khā.īñ

kitne kos abhī chalnā hai

kyā chaurāhe kaisī choTeñ

vahm-o-gumāñ āvāzeñ manzar

merā rasta dekhe rahe haiñ

un ko ginnā un kī fikr meñ Duube rahnā lā-hāsil hai

aslī baat bas itnī sī hai

ḳhatm-e-safar tak

apnī laash ko kāñdhā dene kī taufīq nahīñ hai mujh meñ

aur is se bachne kī koī sūrat nahīñ hai

aksar log kahā karte haiñ

hiirā hiire se kaTtā hai

zahr ko maaro zahr se lekin

maiñ vo hiirā kahāñ se lā.ūñ

jis se safar bhī kaT saktā hai

aisā zahr kahāñ miltā hai

jis se fāsle mar jaate haiñ

raat ka shayad ek baja hai

panw thake hain sar bhaari hai

aankhen ek an-dekhe KHuda se

nind ki bhiksha mang ke behad sharminda hain

pichhle paintalis kaDe koson mein kya kya moD aae hain

har chauraha

kya kya wahm-o-guman laya hai

kya aawazen

kanon ke pardon ko aksar chhed gai hain

kya kya manzar

dhund bhari aankhon ne dekhe

kaisi zarben zehn ne khain

kitne kos abhi chalna hai

kya chaurahe kaisi choTen

wahm-o-guman aawazen manzar

mera rasta dekhe rahe hain

un ko ginna un ki fikr mein Dube rahna la-hasil hai

asli baat bas itni si hai

KHatm-e-safar tak

apni lash ko kandha dene ki taufiq nahin hai mujh mein

aur is se bachne ki koi surat nahin hai

aksar log kaha karte hain

hira hire se kaTta hai

zahr ko maro zahr se lekin

main wo hira kahan se laun

jis se safar bhi kaT sakta hai

aisa zahr kahan milta hai

jis se fasle mar jate hain