jannat-e-kashmir

ham jise kahte the jannat

kyā yahī kashmīr hai

shā.iro tum hī batāo

ab jo ye tasvīr hai

kyā vahī kashmīr hai

jis kī sub.h-o-shām par

azmatoñ ke naam par

saikḌoñ nazmeñ likhīñ ajdād ne

dāstāneñ kiiñ raqam

vo farishtoñ kī tarah ma.asūm saare hī bashar

pāk-dāman vo parī-chehra hasīnā.eñ

ki jin ko

huur vo kahte rahe likhte rahe

aur duniyā meñ yahī charchā kiyā

is zamīñ par hai agar jannat kahīñ

bas yahīñ hai bas yahīñ hai bas yahīñ

jhiil kā darpan

sajīle marġh-zār

āsmāñ se baat karte devdār

jhūmte gaate machalte ābshār

shāh-rāhoñ par safede kī qatār

barf meñ lipTe pahāḌoñ ke badan

Dal ke siine par shikāroñ kī phaban

kohsāroñ se pare niilā gagan

muḳhtalif mausam chanāroñ ke badalte pairahan

dekh kar saare manāzir dil-nashīñ

jaane kitne hī musavvir ne banā.e shāhkār

aur phir tash.hīr kī

jannat-e-kashmīr kī

sach batāo shā.iro naqqāsh-o-afsāna-garo

kyā yahī vo jannat-e-kashmīr hai

har taraf māyūsiyāñ mahrūmiyāñ

be-yaqīnī zindagī ġhārat-garī

maut ke saa.e saroñ par har ghaḌī

ḳhauf-o-dahshat kū-ba-kū

zāfrānī ḳhushbuoñ meñ bas ga.ī bārūd bū

gul-kadoñ ke paas faujī chaukiyāñ

nafratoñ ke darmiyāñ

ḳhvāb ho kar rah gayā amn-o-amāñ

sach batāo shā.iro sūrat-garo

ab jo ye tasvīr hai

kyā vahī kashmīr hai jannat-nishāñ

hum jise kahte the jannat

kya yahi kashmir hai

shairo tum hi batao

ab jo ye taswir hai

kya wahi kashmir hai

jis ki subh-o-sham par

azmaton ke nam par

saikDon nazmen likhin ajdad ne

dastanen kin raqam

wo farishton ki tarah masum sare hi bashar

pak-daman wo pari-chehra hasinaen

ki jin ko

hur wo kahte rahe likhte rahe

aur duniya mein yahi charcha kiya

is zamin par hai agar jannat kahin

bas yahin hai bas yahin hai bas yahin

jhil ka darpan

sajile margh-zar

aasman se baat karte dewdar

jhumte gate machalte aabshaar

shah-rahon par safede ki qatar

barf mein lipTe pahaDon ke badan

Dal ke sine par shikaron ki phaban

kohsaron se pare nila gagan

muKHtalif mausam chanaron ke badalte pairahan

dekh kar sare manazir dil-nashin

jaane kitne hi musawwir ne banae shahkar

aur phir tashhir ki

jannat-e-kashmir ki

sach batao shairo naqqash-o-afsana-garo

kya yahi wo jannat-e-kashmir hai

har taraf mayusiyan mahrumiyan

be-yaqini zindagi ghaarat-gari

maut ke sae saron par har ghaDi

KHauf-o-dahshat ku-ba-ku

zafrani KHushbuon mein bas gai barud bu

gul-kadon ke pas fauji chaukiyan

nafraton ke darmiyan

KHwab ho kar rah gaya amn-o-aman

sach batao shairo surat-garo

ab jo ye taswir hai

kya wahi kashmir hai jannat-nishan