jannat se bhi aziz hai KHak-e-watan mujhe

mar kar milī hai chādar-e-ḳhāk-e-vatan mujhe

miTTī ne is zamīñ kī diyā hai kafan mujhe

bhārat kī gard-e-rāh hai mushk-e-ḳhutan mujhe

jannat se bhī aziiz hai ḳhāk-e-vatan mujhe

chup lag ga.ī hai ab nahīñ tāb-e-suḳhan mujhe

nahr-e-laban hai terī jabīñ kī shikan mujhe

chashm-e-karam hai tujh se but-e-teġh-zan mujhe

rūThī huī nigāh nahīñ dil-shikan mujhe

raas aa.e kyā firāq meñ sair-e-chaman mujhe

ġhunche dikhā rahe haiñ jabīñ par shikan mujhe

miT miT ke gard-e-rāh-e-vatan bin rahā huuñ maiñ

piise hazār gardish-e-charḳh-e-kuhan mujhe

iksīr hai nazar meñ mirī ḳhāk-e-pāk-e-hind

ujḌā huā dayār hai faḳhr-e-vatan mujhe

soz-o-gudāz-e-ġham kā huuñ afsāna-e-ḳhamūsh

samjho ba-rang-e-sāz sarāpā suḳhan mujhe

maiñ ġhuncha-e-fasurda huuñ gulzār-e-dahr meñ

bād-e-bahār kar na sakī ḳhanda-zan mujhe

maqtal meñ 'barq' mujh se kashīda hai teġh-e-yār

taḌpā rahī hai dard se bāñkī dulhan mujhe

mar kar mili hai chadar-e-KHak-e-watan mujhe

miTTi ne is zamin ki diya hai kafan mujhe

bhaarat ki gard-e-rah hai mushk-e-KHutan mujhe

jannat se bhi aziz hai KHak-e-watan mujhe

chup lag gai hai ab nahin tab-e-suKHan mujhe

nahr-e-laban hai teri jabin ki shikan mujhe

chashm-e-karam hai tujh se but-e-tegh-zan mujhe

ruThi hui nigah nahin dil-shikan mujhe

ras aae kya firaq mein sair-e-chaman mujhe

ghunche dikha rahe hain jabin par shikan mujhe

miT miT ke gard-e-rah-e-watan bin raha hun main

pise hazar gardish-e-charKH-e-kuhan mujhe

iksir hai nazar mein meri KHak-e-pak-e-hind

ujDa hua dayar hai faKHr-e-watan mujhe

soz-o-gudaz-e-gham ka hun afsana-e-KHamush

samjho ba-rang-e-saz sarapa suKHan mujhe

main ghuncha-e-fasurda hun gulzar-e-dahr mein

baad-e-bahaar kar na saki KHanda-zan mujhe

maqtal mein 'barq' mujh se kashida hai tegh-e-yar

taDpa rahi hai dard se banki dulhan mujhe