jashn-e-naushin

gharoñ se bachcho nikal aao gir rahī hai barf

bajāo tāliyāñ aur gaao gir rahī hai barf

falak se farsh-e-zamīñ par baras rahā hai nuur

chhatoñ pe khetoñ pe shāḳhoñ pe bas rahā hai nuur

chaman hai nuur kī ik naav gir rahī hai barf

fazā meñ chāroñ taraf surma.ī ujālā hai

thī buuñd paanī kī ab ruī kā jo gaalā hai

diloñ ko shauq se garmāo gir rahī hai barf

hai narm aisī ki phūloñ ko gudgudī aa.e

safed aisī ki bagule kā par bhī sharmā.e

milā ke guḌ meñ ise khaao gir rahī hai barf

banāo qaus-e-quzah barf par girā kar rang

baḌhāo barf ke kheloñ se apne dil kī umang

phisal ke barf pe dikhlāo gir rahī hai barf

tarāsho barf ke putle manāo yaḳh kī bahār

uchhālo barf kī geñdeñ uḌaao yaḳh kī phuvār

chalo ki park meñ be-bhāv gir rahī hai barf

gharoñ se bachcho nikal aao gir rahī hai barf

bajāo tāliyāñ aur gaao gir rahī hai barf

gharon se bachcho nikal aao gir rahi hai barf

bajao taliyan aur gao gir rahi hai barf

falak se farsh-e-zamin par baras raha hai nur

chhaton pe kheton pe shaKHon pe bas raha hai nur

chaman hai nur ki ek naw gir rahi hai barf

faza mein chaaron taraf surmai ujala hai

thi bund pani ki ab rui ka jo gala hai

dilon ko shauq se garmao gir rahi hai barf

hai narm aisi ki phulon ko gudgudi aae

safed aisi ki bagule ka par bhi sharmae

mila ke guD mein ise khao gir rahi hai barf

banao qaus-e-quzah barf par gira kar rang

baDhao barf ke khelon se apne dil ki umang

phisal ke barf pe dikhlao gir rahi hai barf

tarasho barf ke putle manao yaKH ki bahaar

uchhaalo barf ki genden uDao yaKH ki phuwar

chalo ki park mein be-bhaw gir rahi hai barf

gharon se bachcho nikal aao gir rahi hai barf

bajao taliyan aur gao gir rahi hai barf