jashn ka din

junūñ kī yaad manāo ki jashn kā din hai

salīb-o-dār sajāo ki jashn kā din hai

tarab kī bazm hai badlo diloñ ke pairāhan

jigar ke chaak silāo ki jashn kā din hai

tunuk-mizāj hai saaqī na rañg-e-mai dekho

bhare jo shīsha chaḌhāo ki jashn kā din hai

tamīz-e-rahbar-o-rahzan karo na aaj ke din

har ik se haath milāo ki jashn kā din hai

hai intizār-e-malāmat meñ nāsehoñ kā hujūm

nazar sambhāl ke jaao ki jashn kā din hai

vo shorish-e-ġham-e-dil jis ke lai nahīñ koī

ġhazal kī dhan meñ sunāo ki jashn kā din hai

junun ki yaad manao ki jashn ka din hai

salib-o-dar sajao ki jashn ka din hai

tarab ki bazm hai badlo dilon ke pairahan

jigar ke chaak silao ki jashn ka din hai

tunuk-mizaj hai saqi na rang-e-mai dekho

bhare jo shisha chaDhao ki jashn ka din hai

tamiz-e-rahbar-o-rahzan karo na aaj ke din

har ek se hath milao ki jashn ka din hai

hai intizar-e-malamat mein nasehon ka hujum

nazar sambhaal ke jao ki jashn ka din hai

wo shorish-e-gham-e-dil jis ke lai nahin koi

ghazal ki dhan mein sunao ki jashn ka din hai