jashn

kargasoñ kī hukūmat se sahme hue

bulbuloñ kī surīlī sī āvāz meñ

ek muddat se ahl-e-chaman ne yahāñ

koī naġhma ye sach hai sunā hī nahīñ

phuul ke jism par rang-o-bū kī jagah

gahrī gahrī ḳharāsheñ haiñ dukh-dard kī

patte patte pe shabnam nahīñ pyaar kī

patte patte pe hai gard-e-nafrat jamī

buuTe buuTe pe ab koī bhauñrā nahīñ

buuTe buuTe pe raqs-e-sharar 'aam hai

aisī vahshat ke 'ālam meñ sach-much yahāñ

ruup saarā ḳhizāñ meñ bahāroñ kā ḳhud

muntaqil ho gayā muskurāte hue

jām-o-mīnā meñ saaqī bhī mai kī jagah

pyaas hī pyaas bhar bhar ke dene lagā

ik valī apne sachche suḳhan bhuul kar

zindagī kī bahāroñ ko khone lagā

mīr-o-ġhālib bhī ġhazloñ se bachne lage

shā'irī kī jagah ḳhāmushī oḌh kar

daaġh bhī daaġh siine pe lene lage

mīr-anīs aur 'saudā' bhī chup ho ga.e

marsiya aur qasīda bhī chup ho ga.e

'hālī'-o-'josh'-o-'iqbāl' bhī dekhiye

ḳhushk sūraj ke lab ko bhigone kā fan

bhuul kar maqsad-e-shā.irī zehn meñ

'aish-o-'ishrat kī bātoñ ko bone lage

aisī vahshat ke 'ālam meñ ai ham-nafas

kaun jashn-e-bahārāñ kī bāteñ kare

kargason ki hukumat se sahme hue

bulbulon ki surili si aawaz mein

ek muddat se ahl-e-chaman ne yahan

koi naghma ye sach hai suna hi nahin

phul ke jism par rang-o-bu ki jagah

gahri gahri KHarashen hain dukh-dard ki

patte patte pe shabnam nahin pyar ki

patte patte pe hai gard-e-nafrat jami

buTe buTe pe ab koi bhaunra nahin

buTe buTe pe raqs-e-sharar 'am hai

aisi wahshat ke 'alam mein sach-much yahan

rup sara KHizan mein bahaaron ka KHud

muntaqil ho gaya muskuraate hue

jam-o-mina mein saqi bhi mai ki jagah

pyas hi pyas bhar bhar ke dene laga

ek wali apne sachche suKHan bhul kar

zindagi ki bahaaron ko khone laga

mir-o-ghaalib bhi ghazlon se bachne lage

sha'iri ki jagah KHamushi oDh kar

dagh bhi dagh sine pe lene lage

mir-anis aur 'sauda' bhi chup ho gae

marsiya aur qasida bhi chup ho gae

'haali'-o-'josh'-o-'iqbaal' bhi dekhiye

KHushk suraj ke lab ko bhigone ka fan

bhul kar maqsad-e-shairi zehn mein

'aish-o-'ishrat ki baaton ko bone lage

aisi wahshat ke 'alam mein ai ham-nafas

kaun jashn-e-bahaaran ki baaten kare