jaun-eliya se aaKHri mulaqat

vo ek tarz-e-suḳhan kī ḳhushbū

vo ek mahkā huā takallum

laboñ se jaise guloñ kī bārish

ki jaise jharnā sā gir rahā ho

ki jaise ḳhushbū bikhar rahī ho

ki jaise resham ulajh rahā ho

ajab balāġhat thī guftugū meñ

ravāñ thā dariyā fasāhatoñ kā

vo ek maktab thā āgahī kā

vo ilm-o-dānish kā mai-kada thā

vo qalb aur zehn kā tasādum jo guftugū meñ ravāñ-davāñ thā

vo us ke alfāz kī ravānī

vo us kā ruk ruk ke baat karnā

vo sho.ala-e-lafz aur ma.ānī

kahīñ lapaknā kahīñ Thaharnā

Thahar ke phir vo kalām karnā

bahut se jazboñ kī parda-dārī

bahut se jazboñ ko aam karnā

jo maiñ ne pūchhā

guzishta shab ke mushā.ere meñ bahut se shaidā.ī muntazir the

mujhe bhī ye hī pata chalā thā ki aap tashrīf lā rahe haiñ

magar huā kyā

zarā tavaqquf ke ba.ad bole nahīñ gayā maiñ

na jā sakā maiñ

suno huā kyā

maiñ ḳhud ko maa.il hī kar na paayā

ye merī hālat merī tabī.at

phir us pe merī ye bad-mizājī-o-bad-havāsī

ye vahshat-e-dil

miyāñ haqīqat hai ye bhī sun lo ki ab hamāre mushā.ere bhī

nahīñ haiñ un vahshatoñ ke hāmil

jo merī taqdīr ban chukī haiñ

jo merī tasvīr ban chukī haiñ

jo merī taqsīr ban chukī haiñ

phir ik tavaqquf

ki jis tavaqquf kī kaifiyat par garāñ samā.at guzar rahī thī

us ek saa.at kā haath thāme ye ik vazāhat guzar rahī thī

adab-faroshoñ ne jāhiloñ ne mushā.ere ko bhī ik tamāsha banā diyā hai

ġhazal kī taqdīs luuT lī hai adab ko mujrā banā diyā hai

suḳhan-varoñ ne bhī jaane kyā kyā hamāre hisse meñ rakh diyā hai

sitam to ye hai ki chīḳh ko bhī suḳhan ke zumre meñ rakh diyā hai

ilāhī tauba

samā.atoñ meñ ḳharāsheñ aane lagī haiñ ab aur shigāf zehnoñ meñ paḌ ga.e haiñ

miyāñ hamāre qadam to kab ke zamīñ meñ ḳhiffat se gaḌ ga.e haiñ

ḳhamoshiyoñ ke dabīz kohre se chand lamhoñ kā phir guzarnā

vo jaise ḳhud ko udāsiyoñ ke samundaroñ meñ talāsh karnā

vo jaise phir surma.ī ufuq par sitāre alfāz ke ubharnā

ye zindagī se jo be-niyāzī hai kis liye hai

ye roz-o-shab kī jo bad-havāsī hai kis liye hai

bas itnā samjho

ki ḳhud ko barbād kar chukā huuñ

suḳhan to ābād ḳhair kyā ho

magar jahāñ dil dhaḌak rahe hoñ vo shahr ābād kar chukā huuñ

bachā hī kyā hai

thā jis ke aane kā ḳhauf mujh ko vo ek saa.at guzar chukī hai

vo ek saf.ha ki jis pe likkhā thā zindagī ko vo kho chukā hai

kitāb-e-hastī bikhar chukī hai

paḌhā thā maiñ ne bhī zindagī ko

magar tasalsul nahīñ thā us meñ

idhar-udhar se yahāñ vahāñ se ajab kahānī gaḌhī ga.ī thī

samajh meñ aa.ī na is liye bhī ke darmiyāñ se paḌhī ga.ī thī

samajhtā kaise

na falsafī maiñ na koī aalim

uqūbatoñ ke safar pe niklā maiñ ik sitāra huuñ āgahī kā

ajal ke hāthoñ meñ haath Daale ik isti.āra huuñ zindagī kā

itaab nāzil huā hai jis par maiñ vo hī ma.atūb aadmī huuñ

sitamgaroñ ko talab hai jis kī maiñ vo hī matlūb aadmī huuñ

kabhī mohabbat ne ye kahā thā maiñ ek mahbūb aadmī huuñ

magar vo zarb-e-jafā paḌī hai ki ek mazrūb aadmī huuñ

maiñ ek bekal sā aadmī huuñ bahut hī bojhal sā aadmī huuñ

samajh rahī hai ye duniyā mujh ko maiñ ek pāgal sā aadmī huuñ

magar ye pāgal ye nīm-vahshī ḳhirad ke māroñ se muḳhtalif hai

jo kahnā chāhā thā kah na paayā

kahā gayā jo use ye duniyā samajh na paa.ī

na baat ab tak kahī ga.ī hai

na baat ab tak sunī ga.ī hai

sharāb-o-sh.er-o-shu.ūr kā jo ik ta.alluq hai us ke baare meñ raa.e kyā hai

sunā hai ham ne ki aap par bhī bahut se fatve lage haiñ lekin

sharāb-noshī harām hai to

ye mas.ala bhī baḌā ajab hai

maiñ ek mai-kash huuñ ye to sach hai

magar ye mai-kash kabhī kisī ke lahū se sairāb kab huā hai

hamesha aañsū piye haiñ us ne hamesha apnā lahū piyā hai

ye bahs chhoḌo harām kyā hai halāl kyā hai azaab kyā hai savāb kyā hai

sharāb kyā hai

aziyyatoñ se najāt hai ye hayāt hai ye

sharāb-o-shab aur shā.irī ne baḌā sahārā diyā hai mujh ko

sambhāl rakkhā sharāb ne aur rahī hai mohsin ye raat merī

isī ne mujh ko diye dilāse sunī hai is ne hī baat merī

hamesha mere hī saath jaagī hamesha mere hī saath soī

maiñ ḳhush huā to ye muskurā.ī maiñ ro diyā to ye saath roī

ye sher-goī hai ḳhud-kalāmī kā ik zarīya

isī zarīye isī vasīle se maiñ ne ḳhud se vo bāteñ kī haiñ

jo dūsroñ se maiñ kah na paayā

harām kyā hai halāl kyā hai ye sab tamāshe haiñ muftiyoñ ke

ye saare fitne haiñ maulvī ke

harām kar dī thī ḳhud-kushī bhī ki apnī marzī se mar na paa.e

ye mai-kashī bhī harām Thahrī ki ham ko apnā lahū bhī piine kā haq nahīñ hai

ki apnī marzī se ham ko jiine kā haq nahīñ hai

kise batā.eñ

zamīr-o-zarf-e-bashar pe mauqūf haiñ masā.il

samundaroñ meñ uñDel jitnī sharāb chāhe

na harf paanī pe aa.egā aur na us kī taqdīs ḳhatm hogī

to mai-kashī ko harām kahne se pahle dekho

ki piine vaale kā zarf kyā hai haiñ kis ke hāthoñ meñ jām-o-mīnā

ye nukta-sanjī ye nukta-dānī jo maulvī kī samajh meñ aatī to baat bantī

na dīn-o-maz.hab ko jis ne samjhā na jis ne samjhā hai zindagī ko

tahūrā piine kī baat kar ke harām kahtā hai mai-kashī ko

jo dīn-o-maz.hab kā zikr aayā to maiñ ne pūchhā

ki is havāle se raa.e kyā hai

ye ḳhud-parastī ḳhudā-parastī ke darmiyāñ kā jo fāsla hai

jo ik ḳhalā hai ye kyā balā hai

ye dīn-o-maz.hab faqat kitābeñ

ba-juz kitāboñ ke aur kyā hai

kitābeñ aisī jinheñ samajhne kī koshisheñ kam haiñ aur ziyāda paḌhā gayā hai

kitābeñ aisī ki aam insāñ ko in ke paḌhne kā haq hai lekin

inheñ samajhne kā haq na hargiz diyā gayā hai

ki in kitāboñ pe dīn-o-maz.hab ke Thekedār ijāra-dāroñ kī dastaras hai

isī liye to ye dīn-o-maz.hab fasād-o-fitna bane hue haiñ

ye dīn-o-maz.hab

jo ilm-o-hikmat ke saath ho to sukūn hogā

jo dastaras meñ ho jāhiloñ kī junūn hogā

ye ishq kyā hai ye husn kyā hai

ye zindagī kā javāz kyā hai

ye tum ho jī jī ke mar rahe ho ye maiñ huuñ mar mar ke jī rahā huuñ

ye raaz kyā hai

hai kyā haqīqat majāz kyā hai

sivā.e ḳhvāboñ ke kuchh nahīñ hai

ba-juz sarāboñ ke kuchh nahīñ hai

ye ik safar hai tabāhiyoñ kā udāsiyoñ kī ye rahguzar hai

na is ko duniyā kā ilm koī na is ko apnī koī ḳhabar hai

kabhī kahīñ par nazar na aa.e kabhī har ik shai meñ jalva-gar hai

kabhī ziyāñ hai kabhī zarar hai

na ḳhauf is ko na kuchh ḳhatar hai

kabhī ḳhudā hai kabhī bashar hai

huā haqīqat se āshnā to ye sū-e-dār-o-rasan gayā hai

kabhī hañsā hai ye zer-e-ḳhanjar kabhī ye suulī pe hañs diyā hai

kabhī ye gulnār ho gayā hai sināñ pe guftār ho gayā hai

kabhī huā hai ye ġharq-e-dariyā

kabhī ye taqdīr-e-dasht-o-sahrā

raqam huā hai ye āñso.oñ meñ

kabhī lahū ne hai is ko likkhā

hikāyat-e-dil hikāyat-e-jāñ hikāyat-e-zindagī yahī hai

agar salīqe se likkhī jaa.e ibārat-e-zindagī yahī hai

ye husn hai us dhanak kī sūrat

ki jis ke rañgoñ kā falsafa hī kabhī kisī par nahīñ khulā hai

ye falsafa jo fareb-e-paiham kā silsila hai

ki is ke rañgoñ meñ ik ishāra hai be-ruḳhī kā

ik isti.āra hai zindagī kā

kabhī alāmat hai shoḳhiyoñ kī

kabhī kināya hai sādgī kā

badalte mausam kī kaifiyat ke haiñ rañg pinhāñ isī dhanak meñ

kashish sharārat-o-jāzbiyyat ke shoḳh rañgoñ ne is dhanak ko ajiib paikar atā kiyā hai ik aisā manzar atā kiyā hai

ki jis ke sehr-o-asar meñ aa kar

lahū bahut āñkheñ ro chukī haiñ bahut to bīnā.ī kho chukī haiñ

basārteñ kyā basīrateñ bhī to aql-o-dānā.ī kho chukī haiñ

na jaane kitne hī rañg maḳhfī haiñ is dhanak meñ

bas ek rañg-e-vafā nahīñ haiñ

is ek rañgat kī aarzū ne lahū rulāyā hai aadmī ko

yahī batāyā hai āgahī ko

ye ik chhalāvā hai zindagī kā

hasīn dhoka hai zindagī kā

magar muqaddar hai aadmī kā

fareb-e-gandum samajh meñ aayā to maiñ ne jaanā

ye ishq kyā hai ye husn kyā hai

ye ek laġhzish hai jis ke dam se hayāt-e-nau kā bharam khulā hai

wo ek tarz-e-suKHan ki KHushbu

wo ek mahka hua takallum

labon se jaise gulon ki barish

ki jaise jharna sa gir raha ho

ki jaise KHushbu bikhar rahi ho

ki jaise resham ulajh raha ho

ajab balaghat thi guftugu mein

rawan tha dariya fasahaton ka

wo ek maktab tha aagahi ka

wo ilm-o-danish ka mai-kada tha

wo qalb aur zehn ka tasadum jo guftugu mein rawan-dawan tha

wo us ke alfaz ki rawani

wo us ka ruk ruk ke baat karna

wo shoala-e-lafz aur maani

kahin lapakna kahin Thaharna

Thahar ke phir wo kalam karna

bahut se jazbon ki parda-dari

bahut se jazbon ko aam karna

jo main ne puchha

guzishta shab ke mushaere mein bahut se shaidai muntazir the

mujhe bhi ye hi pata chala tha ki aap tashrif la rahe hain

magar hua kya

zara tawaqquf ke baad bole nahin gaya main

na ja saka main

suno hua kya

main KHud ko mail hi kar na paya

ye meri haalat meri tabiat

phir us pe meri ye bad-mizaji-o-bad-hawasi

ye wahshat-e-dil

miyan haqiqat hai ye bhi sun lo ki ab hamare mushaere bhi

nahin hain un wahshaton ke hamil

jo meri taqdir ban chuki hain

jo meri taswir ban chuki hain

jo meri taqsir ban chuki hain

phir ek tawaqquf

ki jis tawaqquf ki kaifiyat par garan samaat guzar rahi thi

us ek saat ka hath thame ye ek wazahat guzar rahi thi

adab-faroshon ne jahilon ne mushaere ko bhi ek tamasha bana diya hai

ghazal ki taqdis luT li hai adab ko mujra bana diya hai

suKHan-waron ne bhi jaane kya kya hamare hisse mein rakh diya hai

sitam to ye hai ki chiKH ko bhi suKHan ke zumre mein rakh diya hai

ilahi tauba

samaaton mein KHarashen aane lagi hain ab aur shigaf zehnon mein paD gae hain

miyan hamare qadam to kab ke zamin mein KHiffat se gaD gae hain

KHamoshiyon ke dabiz kohre se chand lamhon ka phir guzarna

wo jaise KHud ko udasiyon ke samundaron mein talash karna

wo jaise phir surmai ufuq par sitare alfaz ke ubharna

ye zindagi se jo be-niyazi hai kis liye hai

ye roz-o-shab ki jo bad-hawasi hai kis liye hai

bas itna samjho

ki KHud ko barbaad kar chuka hun

suKHan to aabaad KHair kya ho

magar jahan dil dhaDak rahe hon wo shahr aabaad kar chuka hun

bacha hi kya hai

tha jis ke aane ka KHauf mujh ko wo ek saat guzar chuki hai

wo ek safha ki jis pe likkha tha zindagi ko wo kho chuka hai

kitab-e-hasti bikhar chuki hai

paDha tha main ne bhi zindagi ko

magar tasalsul nahin tha us mein

idhar-udhar se yahan wahan se ajab kahani gaDhi gai thi

samajh mein aai na is liye bhi ke darmiyan se paDhi gai thi

samajhta kaise

na falsafi main na koi aalim

uqubaton ke safar pe nikla main ek sitara hun aagahi ka

ajal ke hathon mein hath Dale ek istiara hun zindagi ka

itab nazil hua hai jis par main wo hi matub aadmi hun

sitamgaron ko talab hai jis ki main wo hi matlub aadmi hun

kabhi mohabbat ne ye kaha tha main ek mahbub aadmi hun

magar wo zarb-e-jafa paDi hai ki ek mazrub aadmi hun

main ek bekal sa aadmi hun bahut hi bojhal sa aadmi hun

samajh rahi hai ye duniya mujh ko main ek pagal sa aadmi hun

magar ye pagal ye nim-wahshi KHirad ke maron se muKHtalif hai

jo kahna chaha tha kah na paya

kaha gaya jo use ye duniya samajh na pai

na baat ab tak kahi gai hai

na baat ab tak suni gai hai

sharab-o-sher-o-shuur ka jo ek talluq hai us ke bare mein rae kya hai

suna hai hum ne ki aap par bhi bahut se fatwe lage hain lekin

sharab-noshi haram hai to

ye masala bhi baDa ajab hai

main ek mai-kash hun ye to sach hai

magar ye mai-kash kabhi kisi ke lahu se sairab kab hua hai

hamesha aansu piye hain us ne hamesha apna lahu piya hai

ye bahs chhoDo haram kya hai halal kya hai azab kya hai sawab kya hai

sharab kya hai

aziyyaton se najat hai ye hayat hai ye

sharab-o-shab aur shairi ne baDa sahaara diya hai mujh ko

sambhaal rakkha sharab ne aur rahi hai mohsin ye raat meri

isi ne mujh ko diye dilase suni hai is ne hi baat meri

hamesha mere hi sath jagi hamesha mere hi sath soi

main KHush hua to ye muskurai main ro diya to ye sath roi

ye sher-goi hai KHud-kalami ka ek zariya

isi zariye isi wasile se main ne KHud se wo baaten ki hain

jo dusron se main kah na paya

haram kya hai halal kya hai ye sab tamashe hain muftiyon ke

ye sare fitne hain maulwi ke

haram kar di thi KHud-kushi bhi ki apni marzi se mar na pae

ye mai-kashi bhi haram Thahri ki hum ko apna lahu bhi pine ka haq nahin hai

ki apni marzi se hum ko jine ka haq nahin hai

kise bataen

zamir-o-zarf-e-bashar pe mauquf hain masail

samundaron mein unDel jitni sharab chahe

na harf pani pe aaega aur na us ki taqdis KHatm hogi

to mai-kashi ko haram kahne se pahle dekho

ki pine wale ka zarf kya hai hain kis ke hathon mein jam-o-mina

ye nukta-sanji ye nukta-dani jo maulwi ki samajh mein aati to baat banti

na din-o-mazhab ko jis ne samjha na jis ne samjha hai zindagi ko

tahura pine ki baat kar ke haram kahta hai mai-kashi ko

jo din-o-mazhab ka zikr aaya to main ne puchha

ki is hawale se rae kya hai

ye KHud-parasti KHuda-parasti ke darmiyan ka jo fasla hai

jo ek KHala hai ye kya bala hai

ye din-o-mazhab faqat kitaben

ba-juz kitabon ke aur kya hai

kitaben aisi jinhen samajhne ki koshishen kam hain aur ziyaada paDha gaya hai

kitaben aisi ki aam insan ko in ke paDhne ka haq hai lekin

inhen samajhne ka haq na hargiz diya gaya hai

ki in kitabon pe din-o-mazhab ke Thekedar ijara-daron ki dastaras hai

isi liye to ye din-o-mazhab fasad-o-fitna bane hue hain

ye din-o-mazhab

jo ilm-o-hikmat ke sath ho to sukun hoga

jo dastaras mein ho jahilon ki junun hoga

ye ishq kya hai ye husn kya hai

ye zindagi ka jawaz kya hai

ye tum ho ji ji ke mar rahe ho ye main hun mar mar ke ji raha hun

ye raaz kya hai

hai kya haqiqat majaz kya hai

siwae KHwabon ke kuchh nahin hai

ba-juz sarabon ke kuchh nahin hai

ye ek safar hai tabahiyon ka udasiyon ki ye rahguzar hai

na is ko duniya ka ilm koi na is ko apni koi KHabar hai

kabhi kahin par nazar na aae kabhi har ek shai mein jalwa-gar hai

kabhi ziyan hai kabhi zarar hai

na KHauf is ko na kuchh KHatar hai

kabhi KHuda hai kabhi bashar hai

hua haqiqat se aashna to ye su-e-dar-o-rasan gaya hai

kabhi hansa hai ye zer-e-KHanjar kabhi ye suli pe hans diya hai

kabhi ye gulnar ho gaya hai sinan pe guftar ho gaya hai

kabhi hua hai ye gharq-e-dariya

kabhi ye taqdir-e-dasht-o-sahra

raqam hua hai ye aansoon mein

kabhi lahu ne hai is ko likkha

hikayat-e-dil hikayat-e-jaan hikayat-e-zindagi yahi hai

agar saliqe se likkhi jae ibarat-e-zindagi yahi hai

ye husn hai us dhanak ki surat

ki jis ke rangon ka falsafa hi kabhi kisi par nahin khula hai

ye falsafa jo fareb-e-paiham ka silsila hai

ki is ke rangon mein ek ishaara hai be-ruKHi ka

ek istiara hai zindagi ka

kabhi alamat hai shoKHiyon ki

kabhi kinaya hai sadgi ka

badalte mausam ki kaifiyat ke hain rang pinhan isi dhanak mein

kashish shararat-o-jazbiyyat ke shoKH rangon ne is dhanak ko ajib paikar ata kiya hai ek aisa manzar ata kiya hai

ki jis ke sehr-o-asar mein aa kar

lahu bahut aankhen ro chuki hain bahut to binai kho chuki hain

basarten kya basiraten bhi to aql-o-danai kho chuki hain

na jaane kitne hi rang maKHfi hain is dhanak mein

bas ek rang-e-wafa nahin hain

is ek rangat ki aarzu ne lahu rulaya hai aadmi ko

yahi bataya hai aagahi ko

ye ek chhalawa hai zindagi ka

hasin dhoka hai zindagi ka

magar muqaddar hai aadmi ka

fareb-e-gandum samajh mein aaya to main ne jaana

ye ishq kya hai ye husn kya hai

ye ek laghzish hai jis ke dam se hayat-e-nau ka bharam khula hai