jawahar lal nehru

jān-e-hindostān thā nehru

jaise us kī zabāñ meñ thā jaadū

vo vajāhat vo shaan thī us meñ

vāqa.ī ān-bān thī us meñ

amn-e-ālam kā vo payāmī thā

al-ġharaz dostī kā haamī thā

hind ke āsmāñ kā taarā thā

ham ko us ne bahut sañvārā thā

rūh-parvar ruḳh-o-jamāl us kā

raushnī irtiqā ḳhayāl us kā

lams-e-gul se rahā mo.attar bhī

la.al bhī vo thā aur javāhar bhī

ilm-o-hikmat se pyaar kartā thā

aql vo iḳhtiyār kartā thā

lab pe jai hind us ke na.ara thā

lenā āzādī sirf manshā thā

nūr-afzā haiñ yuuñ karam us ke

naqsh meñ har taraf qadam us ke

har nafas ehtirām karte haiñ

ham use sab salām karte haiñ

rañg us ne diyā fasāne ko

raushnī de gayā zamāne ko

vo ki bachchoñ ko sab se pyārā thā

vo mohabbat kā isti.āra thā

jaan-e-hindostan tha nehru

jaise us ki zaban mein tha jadu

wo wajahat wo shan thi us mein

waqai aan-ban thi us mein

amn-e-alam ka wo payami tha

al-gharaz dosti ka hami tha

hind ke aasman ka tara tha

hum ko us ne bahut sanwara tha

ruh-parwar ruKH-o-jamal us ka

raushni irtiqa KHayal us ka

lams-e-gul se raha moattar bhi

lal bhi wo tha aur jawahar bhi

ilm-o-hikmat se pyar karta tha

aql wo iKHtiyar karta tha

lab pe jai hind us ke nara tha

lena aazadi sirf mansha tha

nur-afza hain yun karam us ke

naqsh mein har taraf qadam us ke

har nafas ehtiram karte hain

hum use sab salam karte hain

rang us ne diya fasane ko

raushni de gaya zamane ko

wo ki bachchon ko sab se pyara tha

wo mohabbat ka istiara tha