jawan aag

goliyoñ se ye javāñ aag na bujh pā.egī

gas pheñkoge to kuchh aur bhī lahrā.egī

ye javāñ aag jo har shahr meñ jaag uTThī hai

tīrgī dekh ke is aag ko bhaag uTThī hai

kab talak is se bachāoge tum apne dāmāñ

ye javāñ aag jalā degī tumhāre aivāñ

ye javāñ ḳhuun bahāyā hai jo tum ne aksar

ye javāñ ḳhuun nikal aayā hai ban ke lashkar

ye javāñ ḳhuun siyah-rāt kā rahne degā

dukh meñ Duube hue hālāt na rahne degā

ye javāñ ḳhuun hai mahloñ pe lapaktā tūfāñ

us kī yalġhār se har ahl-e-sitam hai larzāñ

ye javāñ fikr tumheñ ḳhuun na piine degī

ġhāsibo ab na tumheñ chain se jiine degī

qātilo raah se haT jaao ki ham aate haiñ

apne hāthoñ meñ liye surḳh alam aate haiñ

toḌ degī ye javāñ fikr hisār-e-zindāñ

jaag uTThe haiñ mire des ke bekas insāñ

goliyon se ye jawan aag na bujh paegi

gas phenkoge to kuchh aur bhi lahraegi

ye jawan aag jo har shahr mein jag uTThi hai

tirgi dekh ke is aag ko bhag uTThi hai

kab talak is se bachaoge tum apne daman

ye jawan aag jala degi tumhaare aiwan

ye jawan KHun bahaya hai jo tum ne aksar

ye jawan KHun nikal aaya hai ban ke lashkar

ye jawan KHun siyah-raat ka rahne dega

dukh mein Dube hue haalat na rahne dega

ye jawan KHun hai mahlon pe lapakta tufan

us ki yalghaar se har ahl-e-sitam hai larzan

ye jawan fikr tumhein KHun na pine degi

ghasibo ab na tumhein chain se jine degi

qatilo rah se haT jao ki hum aate hain

apne hathon mein liye surKH alam aate hain

toD degi ye jawan fikr hisar-e-zindan

jag uTThe hain mere des ke bekas insan