jawani

bedār huiiñ mahr-e-javānī kī shuā.eñ

paḌne lagīñ aalam kī isī samt nigāheñ

ḳhvābīda the jazbāt badalne lage karvaT

rū-e-sharar-e-tūr se ha.Tne lagā ghūñgat

bharne lage baazū to hue band-e-qabā tañg

chaḌhne lagā tiflī pe javānī kā nayā rañg

sāġhar kī khanak ban ga.ī us shoḳh kī āvāz

barbat kī huī gudgudī yā jaag uThe saaz

a.azā meñ lachak hai to hai ik loch kamar meñ

a.asāb meñ paara hai to bijlī hai nazar meñ

aane lagī har baat pe ruk ruk ke hañsī ab

rañgīn tamavvuj se girāñ-bār hue lab

vo dekh badalte hue pahlū koī uTThā

vo dekh bigāḌe hue gesū koī uTThā

vo dekh ki kis gul kī mahak phailī hai har-sū

vo dekh ki hai kaun ravāñ bajte haiñ ghuñgrū

kam-baḳht ajal thī ye javānī kī qabā meñ

TukḌe haiñ kisī dil ke bhī naqsh-e-kaf-e-pā meñ

bedar huin mahr-e-jawani ki shuaen

paDne lagin aalam ki isi samt nigahen

KHwabida the jazbaat badalne lage karwaT

ru-e-sharar-e-tur se haTne laga ghungat

bharne lage bazu to hue band-e-qaba tang

chaDhne laga tifli pe jawani ka naya rang

saghar ki khanak ban gai us shoKH ki aawaz

barbat ki hui gudgudi ya jag uThe saz

aaza mein lachak hai to hai ek loch kamar mein

aasab mein para hai to bijli hai nazar mein

aane lagi har baat pe ruk ruk ke hansi ab

rangin tamawwuj se giran-bar hue lab

wo dekh badalte hue pahlu koi uTTha

wo dekh bigaDe hue gesu koi uTTha

wo dekh ki kis gul ki mahak phaili hai har-su

wo dekh ki hai kaun rawan bajte hain ghungru

kam-baKHt ajal thi ye jawani ki qaba mein

TukDe hain kisi dil ke bhi naqsh-e-kaf-e-pa mein