jawaz

ka.ī dinoñ se

udaas huuñ maiñ

javāz kyā hai pata nahīñ hai

kisī ne

kuchh bhī kahā nahīñ hai

burā bhī to

kuchh huā nahīñ hai

kisī se

dil bhī dukhā nahīñ hai

ḳhatā bhī

koī huī nahīñ hai

sazā bhī

koī milī nahīñ hai

javāz kyā hai

udaas huuñ maiñ

abhī to

niklā huuñ mall se maiñ

tamām ḳhushiyāñ

ḳharīd kar ke

magar

ye thaile

to bojh se haiñ

vo saarī chīzeñ

jo ḳhvāhishoñ meñ haiñ dūsroñ kī

vo mujh ko hāsil haiñ phir bhī mujh ko ḳhushī nahīñ hai

javāz kyā hai

udaas huuñ maiñ

colleague office meñ

ḳhush haiñ mujh se

hai mere yāroñ ko

naaz mujh par

bahut se logoñ ke

dil meñ ghar hai

tamām rishta nibhā rahā huuñ

kahīñ pe koī kamī nahīñ hai

magar maiñ ḳhud se

kaTā kaTā huuñ

judā judā huuñ

javāz kyā hai

udaas huuñ maiñ

abhī to baiThā thā

saath yāroñ ke qahqahoñ meñ

abhī to

mahfil jamī huī thī

abhī to

maiñ ne ġhazal kahī thī

abhī to

logoñ ne daad dī thī

ye sab

ḳhushī thī

magar

ye mujh meñ

kahīñ nahīñ thī

javāz kyā hai

udaas huuñ maiñ

abhī to maiñ ne

dinner kiyā thā

shahr ke maḳhsūs restaurant meñ

hasīn waiters ne muskurāhaT se

mujh ko Table sajā ke dī thī

tamām khāne lazīz the par

mire liye kuchh maza nahīñ thā

javāz kyā hai

udaas huuñ maiñ

na.e color se

purāne parde badal diye haiñ

ḳharīd laayā huuñ

chaa.e kā cup branded ik

tamām qismoñ ke phuul

gamloñ meñ lā ke maiñ ne

sajā diye haiñ

purānā T V

badal diyā hai

tamām channel bhī maiñ ne

H D meñ le liye haiñ

hazār mauzūa pe serial haiñ

har ek ġhenre kī in pe filmeñ bharī paḌī haiñ

magar maiñ

channel badal rahā huuñ

kahīñ bhī lagtā to jī nahīñ hai

mujhe kahīñ bhī

sukūñ nahīñ hai

ḳhushī ke

sāmān to bahut haiñ

magar kisī meñ ḳhushī nahīñ hai

javāz kyā hai

udaas huuñ maiñ

ye nazm

paḌhnā

to lauT aanā

tumheñ ye shāyad pata nahīñ hai

bahut ziyāda

udaas huuñ maiñ

javāz tum ho

kai dinon se

udas hun main

jawaz kya hai pata nahin hai

kisi ne

kuchh bhi kaha nahin hai

bura bhi to

kuchh hua nahin hai

kisi se

dil bhi dukha nahin hai

KHata bhi

koi hui nahin hai

saza bhi

koi mili nahin hai

jawaz kya hai

udas hun main

abhi to

nikla hun mall se main

tamam KHushiyan

KHarid kar ke

magar

ye thaile

to bojh se hain

wo sari chizen

jo KHwahishon mein hain dusron ki

wo mujh ko hasil hain phir bhi mujh ko KHushi nahin hai

jawaz kya hai

udas hun main

colleague office mein

KHush hain mujh se

hai mere yaron ko

naz mujh par

bahut se logon ke

dil mein ghar hai

tamam rishta nibha raha hun

kahin pe koi kami nahin hai

magar main KHud se

kaTa kaTa hun

juda juda hun

jawaz kya hai

udas hun main

abhi to baiTha tha

sath yaron ke qahqahon mein

abhi to

mahfil jami hui thi

abhi to

main ne ghazal kahi thi

abhi to

logon ne dad di thi

ye sab

KHushi thi

magar

ye mujh mein

kahin nahin thi

jawaz kya hai

udas hun main

abhi to main ne

dinner kiya tha

shahr ke maKHsus restaurant mein

hasin waiters ne muskurahaT se

mujh ko Table saja ke di thi

tamam khane laziz the par

mere liye kuchh maza nahin tha

jawaz kya hai

udas hun main

nae color se

purane parde badal diye hain

KHarid laya hun

chae ka cup branded ek

tamam qismon ke phul

gamlon mein la ke main ne

saja diye hain

purana T V

badal diya hai

tamam channel bhi main ne

H D mein le liye hain

hazar mauzua pe serial hain

har ek ghenre ki in pe filmen bhari paDi hain

magar main

channel badal raha hun

kahin bhi lagta to ji nahin hai

mujhe kahin bhi

sukun nahin hai

KHushi ke

saman to bahut hain

magar kisi mein KHushi nahin hai

jawaz kya hai

udas hun main

ye nazm

paDhna

to lauT aana

tumhein ye shayad pata nahin hai

bahut ziyaada

udas hun main

jawaz tum ho