jawaz

ḳhayāl ke dastar-ḳhvān se

lazīz zā.iqe chakhtī mohabbat

adhūrī ziyāfat se

bhuuk miTāne kī aadī hai

garm fazā

joshīlī ret se

mastī meñ magan hai

jis sahrā ke dāman meñ

merā ḳhema gaḌā hai

vahīñ kuchh fāsle se

merā ghoḌā

chābuk ke raqs kā muntazir hai

naqshe par ubhre dariyā kī taraf pesh-qadmī kā

ijāzat-nāma to mil chukā

magar maiñ ḳhud-aziyyatī kī

tārīḳhī tartīb meñ

radd-o-badal se inkārī huuñ

jis vaadī meñ

muskurāhaToñ kā zāfrānī sūraj

aur vasl ke kāsnī chāñd kā baserā hai

maiñ us maskan kī taraf

nahīñ lauT saktī

agarche merī majbūr mohabbat

merī ḳhud-sāḳhta zad se tang hai

magar maiñ kyā karūñ

maiñ ne mahrūm insānoñ ke

mushtarka sarmā.e meñ

apnā hissa Daal rakhā hai

KHayal ke dastar-KHwan se

laziz zaiqe chakhti mohabbat

adhuri ziyafat se

bhuk miTane ki aadi hai

garm faza

joshili ret se

masti mein magan hai

jis sahra ke daman mein

mera KHema gaDa hai

wahin kuchh fasle se

mera ghoDa

chabuk ke raqs ka muntazir hai

naqshe par ubhre dariya ki taraf pesh-qadmi ka

ijazat-nama to mil chuka

magar main KHud-aziyyati ki

tariKHi tartib mein

radd-o-badal se inkari hun

jis wadi mein

muskurahaTon ka zafrani suraj

aur wasl ke kasni chand ka basera hai

main us maskan ki taraf

nahin lauT sakti

agarche meri majbur mohabbat

meri KHud-saKHta zad se tang hai

magar main kya karun

main ne mahrum insanon ke

mushtarka sarmae mein

apna hissa Dal rakha hai