jazba-e-isar

balā se ham ko laTkā.e agar sarkār phāñsī se

laTakte aa.e aksar paikar-e-īsār phāñsī se

lab-e-dam bhī na kholī zālimoñ ne hathkaḌī merī

tamanna thī ki kartā maiñ lipaT kar pyaar phāñsī se

khulī hai mujh ko lene ke liye āġhosh-e-āzādī

ḳhushā ki ho gayā mahbūb kā dīdār phāñsī se

kabhī o be-ḳhabar tahrīk-e-āzādī bhī ruktī hai

baḌhā kartī hai is kī tezī-e-raftār phāñsī se

yahāñ tak sarfaroshān-e-vatan baḌh jā.eñge qātil

ki laTkāne paḌeñge nit tujhe do-chār phāñsī se

nazar ā.eñge har sū sham-e-āzādī ke parvāne

hazāroñ murda dil ho jā.eñge bedār phāñsī se

farishte āsmāñ se bahr-e-pā-bosī utarte haiñ

ki 'sābir' jhūlte haiñ desh ke sardār phāñsī se

bala se hum ko laTkae agar sarkar phansi se

laTakte aae aksar paikar-e-isar phansi se

lab-e-dam bhi na kholi zalimon ne hathkaDi meri

tamanna thi ki karta main lipaT kar pyar phansi se

khuli hai mujh ko lene ke liye aaghosh-e-azadi

KHusha ki ho gaya mahbub ka didar phansi se

kabhi o be-KHabar tahrik-e-azadi bhi rukti hai

baDha karti hai is ki tezi-e-raftar phansi se

yahan tak sarfaroshan-e-watan baDh jaenge qatil

ki laTkane paDenge nit tujhe do-chaar phansi se

nazar aaenge har su sham-e-azadi ke parwane

hazaron murda dil ho jaenge bedar phansi se

farishte aasman se bahr-e-pa-bosi utarte hain

ki 'sabir' jhulte hain desh ke sardar phansi se