jazira

vahāñ huuñ maiñ

jahāñ chāroñ taraf mere

samundar āñsūoñ ke bah rahe haiñ

agar maiñ bhāgnā chāhūñ

to un meñ Duub jā.ūñgā

mafar kā rāsta koī nahīñ hai

to maiñ ik jail meñ rakkhe ga.e

ik aise qaidī kī tarah huuñ

ki jis ko kāTnī hogī sazā-e-qaid-e-umr

magar kis jurm kī pādāsh meñ

aisī sazā kāTūñ

har ik qaidī sazā-e-umr-e-daurāñ kaaT kar

āzād samtoñ meñ ravāna ho chukā hai

magar maiñ aaj bhī anjāne jurmoñ kā sazā-yāb

salīb-e-ġham uThā.e phir rahā huuñ

maiñ apnī zaat ke tanhā jazīre meñ rahūñ kab tak

wahan hun main

jahan chaaron taraf mere

samundar aansuon ke bah rahe hain

agar main bhagna chahun

to un mein Dub jaunga

mafar ka rasta koi nahin hai

to main ek jail mein rakkhe gae

ek aise qaidi ki tarah hun

ki jis ko kaTni hogi saza-e-qaid-e-umr

magar kis jurm ki padash mein

aisi saza kaTun

har ek qaidi saza-e-umr-e-dauran kaT kar

aazad samton mein rawana ho chuka hai

magar main aaj bhi anjaane jurmon ka saza-yab

salib-e-gham uThae phir raha hun

main apni zat ke tanha jazire mein rahun kab tak