جزیرہ

وہاں ہوں میں

جہاں چاروں طرف میرے

سمندر آنسوؤں کے بہہ رہے ہیں

اگر میں بھاگنا چاہوں

تو ان میں ڈوب جاؤں گا

مفر کا راستہ کوئی نہیں ہے

تو میں اک جیل میں رکھے گئے

اک ایسے قیدی کی طرح ہوں

کہ جس کو کاٹنی ہوگی سزائے قید عمر

مگر کس جرم کی پاداش میں

ایسی سزا کاٹوں

ہر اک قیدی سزائے عمر دوراں کاٹ کر

آزاد سمتوں میں روانہ ہو چکا ہے

مگر میں آج بھی انجانے جرموں کا سزا یاب

صلیب غم اٹھائے پھر رہا ہوں

میں اپنی ذات کے تنہا جزیرے میں رہوں کب تک