ji chahta hai

unheñ bhī bulāne ko jī chāhtā hai

nahar meñ nahāne ko jī chāhtā hai

na puurī na halva na laDDū na barfī

mirā khiir khāne ko jī chāhtā hai

jahāñ duudh kī dekhtā huuñ kaḌāhī

vahīñ baiTh jaane ko jī chāhtā hai

vo jin meñ hai kuchh khāne piine kā qissa

vo bāteñ banāne ko jī chāhtā hai

maiñ buzdil huuñ maujoñ se ghabrā rahā huuñ

kināre pe aane ko jī chāhtā hai

jo ustād kahtā hai paḌhne ko ham se

bahāna banāne ko jī chāhtā hai

jahāñ ho na paanī na tālāb koī

vahīñ Duub jaane ko jī chāhtā hai

falak se ye rangīn tāroñ kī geñdeñ

mirā toḌ laane ko jī chāhtā hai

ġhazal koī 'sibtain' suntā nahīñ hai

aur apnā sunāne ko jī chāhtā hai

unhen bhi bulane ko ji chahta hai

nahar mein nahane ko ji chahta hai

na puri na halwa na laDDu na barfi

mera khir khane ko ji chahta hai

jahan dudh ki dekhta hun kaDahi

wahin baiTh jaane ko ji chahta hai

wo jin mein hai kuchh khane pine ka qissa

wo baaten banane ko ji chahta hai

main buzdil hun maujon se ghabra raha hun

kinare pe aane ko ji chahta hai

jo ustad kahta hai paDhne ko hum se

bahana banane ko ji chahta hai

jahan ho na pani na talab koi

wahin Dub jaane ko ji chahta hai

falak se ye rangin taron ki genden

mera toD lane ko ji chahta hai

ghazal koi 'sibtain' sunta nahin hai

aur apna sunane ko ji chahta hai