jine marne ke darmiyan ek saat

kabhī jiine kabhī marne kī ḳhvāhish rok letī hai

vagarna maiñ havā kī lahr meñ tahlīl ho jā.ūñ

kidhar jā.ūñ ki har-sū sā.ateñ raste kā patthar haiñ

agar baiThā rahūñ to raakh meñ tabdīl ho jā.ūñ

vo jādūgar thā jis ne raat par pahre biThā.e the

vagarna ab talak ye chāñd taare miT chuke hote

junūn-e-āgahī mānūs āñkhoñ se chhalak jaatā

bisāt-e-zindagī ke saare mohre piT chuke hote

mujhe ma.alūm hai ik chāñd din ko bhī nikaltā hai

mujhe ma.alūm hai rāteñ bhī ik ḳhurshīd rakhtī haiñ

agar ye donoñ aalam ek ho jaa.eñ to phir kyā ho

havā.eñ raat din yaktā.ī kī ummīd rakhtī haiñ

magar in vus.atoñ ko kaun bāñhoñ meñ sameTegā

kahāñ se aa.egī vo raushnī jo muntahī hogī

diloñ kī tīrgī kuchh aur gahrī hotī jaatī hai

aziyyat raushnī kī din kī rag rag ne sahī hogī

kidhar jā.ūñ ki har sū rāste kirnoñ kī sūrat haiñ

magar kirnoñ pe chalnā be-qarārī ko nahīñ aatā

vo nuqta jis pe maiñ huuñ marqad-e-shām-e-ġharībāñ hai

magar is samt koī āh-o-zārī ko nahīñ aatā

kabhi jine kabhi marne ki KHwahish rok leti hai

wagarna main hawa ki lahr mein tahlil ho jaun

kidhar jaun ki har-su saaten raste ka patthar hain

agar baiTha rahun to rakh mein tabdil ho jaun

wo jadugar tha jis ne raat par pahre biThae the

wagarna ab talak ye chand tare miT chuke hote

junun-e-agahi manus aankhon se chhalak jata

bisat-e-zindagi ke sare mohre piT chuke hote

mujhe malum hai ek chand din ko bhi nikalta hai

mujhe malum hai raaten bhi ek KHurshid rakhti hain

agar ye donon aalam ek ho jaen to phir kya ho

hawaen raat din yaktai ki ummid rakhti hain

magar in wusaton ko kaun banhon mein sameTega

kahan se aaegi wo raushni jo muntahi hogi

dilon ki tirgi kuchh aur gahri hoti jati hai

aziyyat raushni ki din ki rag rag ne sahi hogi

kidhar jaun ki har su raste kirnon ki surat hain

magar kirnon pe chalna be-qarari ko nahin aata

wo nuqta jis pe main hun marqad-e-sham-e-ghariban hai

magar is samt koi aah-o-zari ko nahin aata